Dələduzluqda suçlanan veteran futbolçu Maşallah Əhmədov barəsində Bakı Apellyasiya Məhkəməsinin qərarından zərərçəkmişin verdiyi kassasiya şikayəti üzrə məhkəmənin vaxtı məlum olub. Ali Məhkəmədən mətbuta verilən məlumata görə, kassasiya şikayətinə hakim İmran Hacıqayıbovun sədrliyi ilə baxılacaq. Məhkəmə prosesi fevralın 6-na təyin olunub.
Xatərladaq ki, veteran futbolçu 2015-ci ilin dekabrında Binəqədi Rayon Polis İdarəsinin əməkdaşları tərəfindən saxlanılıb. Rəsmi məlumata görə, bizneslə məşğul olan "Neftçi"nin sabiq “10 nömrəsi” Bakıda bir neçə nəfərə 150 min manatdan artıq dəyərdə xaricdən daş plitə gətirəcəyini vəd edib. Lakin Maşallah bəy sözünə əməl etməyib, həmin şəxslərin pulunu da qaytarmayıb. Binəqədi Rayon Məhkəməsində Əhmədov barəsində üç ay müddətinə həbs qətimkan tədbiri seçilib. Sonradan Binəqədi Rayon Məhkəməsi onun haqda seçilmiş həbs qətimkan tədbirini ləğv edərək, veteran futbolşunu ev dustaqlığına buraxıb. Bakı Ağır Cinayətlər Məhkəməsinin hökmü ilə Maşallah bəy 8 il müddətinə azadlıqdan məhrum edilib. Bakı Apellyasiya Məhkəməsində, hakim Faiq Qasımovun sədrliyi ilə keçirilən prosesdə qərar elan edilib. Qərara əsasən, Əhmədovun barəsində çıxarılmış birinci instansiya məhkəməsinin hökmü dəyişdirilərək cəzası 8 ildən 2 ilə endirilib. Həmin qərardan narazı qalan zərərçəkmiş Yusif Əzizov Ali Məhkəməyə müraciət edib. Onu da xatırladaq ki, “ağ-qaralar”ın sabiq forvardı ötən il oktyabrın 7-də saxlanıldığı Bakı İstintaq Təcridxanasından cəzasının dörddəüç hissəsini çəkdiyinə görə vaxtından 2 ay əvvəl azadlığa buraxılıb. Onun azadlığa buraxılması ilə bağlı apellyasiya şikayəti isə verilməyib.
RƏŞAD