Rusiya çempionatının autsayderi bakılıları rəzil etdi
Yanvarın 5-də Bakıda bir araya gələn, paytaxtda olduğu müddətdə yoldaşlıq görüşündə “Keşlə”yə 1:2 hesabıyla uduzan “Neftçi” ayın 17-dən Antalyadadı. Tərlan Əhmədovun yetirmələri dünən Türkiyədəki sınaq matçlarına başladı. Kaş başlamazdı...
Ölkənin 81 yaşlı, ən köklü klubu Rusiya premyer-liqasının sonuncu pilləsində qərarlaşan “SKA-Xabarovsk”la oyunda 1:8 hesabıyla məğlub oldu. İndiyə qədər premyer-liqa klublarımızın Antalya tarixində belə faciəvi nəticə qeydə alınmamışdı. Yaxın keçmişə təsadüf edən buna bənzər hesab yaddaşlardan silinməyib ki, 2016-nın payızında premyer-liqa matçında “Qəbələ” “Neftçi”ni qapazaltı etmişdi – 8:0.
“Neftçi”nin daxilində ciddi çəkişmələrin olduğu sirr deyil. “Transfer pəncərəsi” açılandan əsəblər tarıma çəkilib. AFFA rəsmisi Riad Rəfiyevlə pul qazanmaqdan doymayan Kamil Məmmədovun “ağ-qaralar”a səviyyəsiz legionerləri “sırımaq” istəyinin nəticəsidi ki, rəhbərliklə baş məşqçi arasında soyuqluq yaranıb. Başlarını itiriblər, nə edəcəklərini bilmirlər. Düşərgəyə düz-əməlli futbolçular gəlmir. Təklif olunanlar da ucuzlardı, baha qiymətə. Kimsə “yoldaşlıq oyunlarda nəticə önəmli deyil-filan” deyib məlum yenilgiyə don geydirə bilməz. Nəticə önəmli deyilsə, rusların qapısına 8 qolu siz vurardız. Əl ətə çatmayanda, iz azdırmaq üçün oyunun statusunun ortaya atılmasının bəhanə olduğunu uşaq da bilir.
Bu və başqa problemlər heç bir halda “Neftçi”nin qapısında 8 qol görməsinə əsas vermir. Düzdü, Anton Krivotsyukla Elnur Cəfərov U-21-in düşərgəsindədi, Rəşad Sadiqov zədəsini müalicə etdirir, Hüqo Barqas getdi, yeni transfer Fransisko Qarsiya ideal formadan çox-çox uzaqdı. Bütün bunlar da bakılıların o şəkildə biabır olmasına əsas vermir.
Ruslara 1:8 hesabıyla uduzan, ilk yarıda qapısında 6 cavabsız top görən bakılıların start heyəti belə olub: Rəşad Əzizli, Məhəmməd Mirzəbəyov, Ruslan Abışov, Kiril Petrov, İlkin Qırtımov, Derlis Meza Kolli, Emin Mahmudov, Fransisko Qarsiya, Elnur Süleymanov, Rəhman Hacıyev, Mirabdulla Abbasov.
Heyətində ötən ilin yayında “Neftçi”dən ayrılan Georgi Novalovskinin də yer aldığı “SKA-Xabarovsk”un heyətində Vladislav Nikiforov (8, 17, 49) het-trik edib. Dmitri Kabutovla (2, 89) Artyom Samsonov (10, 20) dubla imza atıb. Daha bir qol müəllifi isə 37-ci dəqiqədə Nikolay Kalinski olub. Hesab 0:7 olanda, 85-ci dəqiqədə Mirabdulla Abbasov rəqib qapısına yol tapıb.
Bu oyunda Tərlan Əhmədov iki legioneri gözdən keçirib: ukraynalı İqor Sikorski və Roxdi Axente. İqor hücumda və yarımmüdafiənin sol cinahında çıxış etdiyi halda, Roxdi sol cinah müdafiəçisi və dayaq yarımmüdafiəçisi funksiyasını yerinə yetirə bilir. Baş məşqçinin onlar haqda yekun qərar verib-vermədiyini öyrənə bilmədik.
Məlum faciə ilə bağlı baş məşqçi Tərlan Əhmədovla aparıcı futbolçuların fikirlərini dinləmək maraqlı olardı. Lakin məğlubiyyətin səbəbkarlarının hansısa açıqlamasına rast gəlmədik. Telefon vasitəsilə əlaqə saxlamaq cəhdlərimiz də nəticəsiz qaldı.
“Ağ-qaralar” növbəti yoldaşlıq oyununa yanvarın 25-də çıxacaq. Tərlan Əhmədovun yetirmələri həmin gün səhər saatlarında Rumıniya “Konkordiya”sı, axşam isə Bolqarıstan “Slaviya”sı ilə münasibətlərinə aydınlıq gətirəcək. Allah betərindən qorusun!
HƏBİB