“Alesio hər gün bizə videolar göndərir"
Yanvarın 30-dan fevralın 10-dək Sloveniyanın paytaxtı Lyublyanada keçiriləcək Avropa çempionatının final mərhələsinə hazırlaşan futzal yığmamız məşqləri davam etdirir. Şənbə günü bir məşq baş tutdu ki, komanda bütövlükdə taktiki yöndə çalışdı. Joze Alesio da Silva və yetirmələri əsasən müdafiədən hücuma sürətli keçid və standart vəziyyətlər üzərində işlədi. Qeyd edək ki, Tyaqo Teles hələ də komandadan ayrı çalışır. Bununla belə, yüngül zədəsi olan braziliyalı forvard isinməyə xidmət edən “kvadrat” məşqdə yoldaşlarına qoşuldu. O, Alesionun taktiki izahatları zamanı da lövhəyə yaxınlaşıb dinləyir, sadəcə, ikitərəfli oyunda iştirak etmirdi. Yığma üzvlərinin axşam məşqinin əvəzinə “Bayıl Arena”da Fransa ilə oyunun videoyazısını izləyib təhlil edəcəyini də öyrəndik.
Müşahidələrimizə əsasən futzalçıların həvəslə hazırlaşdıqlarını, AÇ-yə yaxşı kökləndiklərini deyə bilərik. Bu mənada braziliyalıların üzərinə daha çox yük düşür. Çox güman, İranla ilk qarşılaşmada Alesionun start “5-liy”i Rövşən Hüseynli, Rizvan Fərzəliyev, Eduardo, Qallo və Vassuradan ibarət olacaq. Sonuncu yaxşı formadadı. Hərçənd Birləşmiş Ərəb Əmirliklərinin “Əl Dafra” klubunda çıxış edən Vassura İran turnirində zəif təsir bağışlamışdı. Sən demə, bu, səbəbsiz deyilmiş. Braziliyalı AÇ ərəfəsində yığmanın düşərgəsindəki ab-havadan ağızdolusu danışdı.
- Millinin düşərgəsinə hamıdan gec qoşuldun. Səbəbini izah edə bilərsən?
- Çünki Dubayda çempionat davam edir və formasını geydiyim klubun oyunları var idi. Ona görə də qalmalı oldum və kömək etdim. Əslində hazırlıq FİFA-nın “pəncərə”sinə düşmədiyinə görə məni yenə buraxmaya bilərdilər, sadəcə, milli komandamıza hörmət əlaməti olaraq gəlməyimə icazə verdilər.
- Yəqin razılaşarsan ki, İrandakı turnirdə özünü heç də yaxşı tərəfdən göstərə bilmədin.
- Həqiqətən də problemlərim var idi. Klubum məni turnirə buraxmaq istəmirdi. Çünki oyunlarımız var idi. Buna görə də fikrim qarışıq idi, qarşılaşmalara köklənə bilmirdim. Ancaq indi vəziyyət fərqlidi. “Əl Dafra” məni könüllü yola saldı. Hər şey qaydasındadı, məşqlərdə də fəal iştirak edirəm.
- Axı, İran turniri ilə Avropa çempionatının statusu da eyni deyil...
- Əlbəttə, adi turnirlə rəsmi oyunları müqayisə etmək düzgün deyil. Amma belə turnirlərdə rəsmi yarışa nə qədər hazır olduğunu yoxlayırsan. İran turniri bizim üçün hazırlıq xarakteri daşıyırdı. Avropa çempionatı tam fərqli səviyyəyə malikdi. Adicə qrupumuza diqqət yetirin. Fransa millisi debütantdı, ancaq futzal ənənəsi olan, daim final mərhələsində iştirakına alışdığımız Xorvatiya kimi komandanı məyus etdilər. Bu onu göstərir ki, çox çalışmalıyıq. Xüsusilə də Fransa ilə oyun çox əhəmiyyətlidi. Biz bu rəqibi udmalıyıq ki, növbəti qarşılaşma haqda rahat düşünək.
- İspaniya başqa dünyadı?
- İspaniya haqda şərh vermək artıqdı. Qazandıqları titullar hər şeyi deyir. Ancaq onlarla sonuncu dəfə dünya çempionatının final mərhələsində oynadıq və 2:4 hesabı ilə uduzduq. Düzdü, həmin oyunu təəssüf hissi ilə xatırlayıram. Çünki mənim üçün uğursuz alındı. Belə ki, 2 avtoqolla yadda qaldım. Öz qapımıza vurduğum o qolları nəzərə almasaq, deməli, oyun 2:2 hesablı heç-heçə ilə başa çatıb (gülür). Məncə, komandamız dünyada istənilən yığma ilə bərabər mübarizə aparacaq gücdədi.
- Düşərgədə ab-hava necədi?
- Əsasən taktiki planda çalışırıq. Alesio necə müdafiə olunmağımızı, eləcə də hücuma keçərkən nə etməli olduğumuzu izah edir. Hər şey yaxşıdı.
- Fransanın hansısa oyununun videoyazısına baxmısız?
- Təbii ki, baxmışıq. Alesio hər gün bizə videolar göndərir və qeyd edir ki, baxın, filan oyunçu necə driblinq edir, künc zərbəsi zamanı hansı “ev tapşırıqları”nı yerinə yetirirlər, autdan topu necə başlayırlar və s. Yəqin rəqibi ayrıca, komanda şəklində də təhlil edəcəyik. Alesio çox ağıllı məşqçidi. Bizi həmin oyunda nələrin gözlədiyini, eyni zamanda nələr edəcəyimizi bilirik.
- Sürprizlər hazırlamısız?
- Alesio olan yerdə hər zaman sürpriz olur. Bunu etmək lazımdı. Çünki çox ağır oyun olacaq. Bu qarşılaşmada qazanılacaq qələbə növbəti mərhələyə yüksəlmək baxımından çox suallara aydınlıq gətirəcək.
- Həftənin əvvəlində İranla iki oyun keçirəcəksiz və ümumiyyətlə, bu, bir ay ərzində onlarla üçüncü görüş olacaq. Çətin olmayacaq?
- Düzdü, çətin olacaq, çünki artıq bir-birimizi yaxşı tanıyırıq. İranla DÇ-də də qarşılaşmışdıq. Yoxlama oyunu olmasına baxmayaraq, bizə qələbə qazanmaq lazımdı. İran da güclü komandadı və onları yenmək asan olmayacaq. Asiyalılar 7-8 ildi bir yerdə oynayırlar. Açığı, bu matçlarda Fransaya qarşı oyunun prezentasiyasını edəcəyik. Görək, necə alınacaq.
- Dubayda vəziyyət necədi?
- Hər şey əladı. Yaradılan şəraitdən çox razıyam. Klub rəhbəliyinə gəlməyimə şərait yaratdığına görə təşəkkür edirəm. Çempionatda 9 komanda iştirak edir. Orda da futzalı inkişaf etdirməyə çalışırlar.
- Azərbaycan çempionatı ilə müqayisə edə bilərsən?
- Sözsüz, Azərbaycan çempionatı daha güclüdü. Yüksək liqada ən azı 4 komanda yaxşı vəziyyətdədi, qüvvələr nisbəti yaxındı. Bunu çempionatın oyunlarını izlədiyim üçün bilirəm. Oyunların canlı yayınlanmasının bu cəhəti çox yaxşıdı. Mümkün qədər "CBC Sport"la yayınlanan qarşılaşmalara baxıram və mübarizədən xəbərdaram. Orda da komandalar indi legionerləri dəvət edirlər. Əcnəbi futzalçıların gəlişi səviyyənin yüksəlməsinə təkan verəcək.
- Yenidən “Araz”a dönməyin mümkündü?
- Bunu mən yox, Allah bilir. Həyatda hər şey ola bilər. İndi bunu heç kim təklif etməyib, gələcəkdə necə olacağını isə zaman göstərəcək.
MİRAĞA