“Dino çinlilərin çox-çox sərfəli təklifi qarşısında duruş gətirə bilmədi”
Qış fasiləsində Dino Ndlovu “Qarabağ”la vidalaşdı. Belə ki, cənubi afrikalı forvard karyerasını “Xançjou Qrintaun”da davam etdirəcək. Ndlovu Çin klubu ilə 2 illik razılıq əldə edib. Deyilənə görə, bu keçid ağdamlılara 750 min avro qazandırdı.
Təbii, “Qarabağ”la ÇL-də iştirak edən futbolçunun Çinin 1-ci dəstəsinə üz tutması müzakirələrə səbəb oldu. Əslində Dino “köhlən atlar” üçün önəmli füqurlardan sayılırdı. Onun ağdamlıların ÇL-in qrupuna düşməsində əməyi danılmazdı. Bundan başqa, Ndlovu “Qarabağ”ın uzun müddət axtardığı hücumçulardan idi. Odu ki, klub rəhbərliyinin tezliklə afrikalının yoxluğunu unutduracaq forvard tapması elə də asan olmayacaq. Yeni gələnin uyğunlaşması isə vaxt alacaq. ÇL-dəki nəticəni təkrarlamaq istəyən klub Dinodan belə asanlıqla əl çəkməməliydi. Ancaq onu da bildirək ki, 750 min avro yetərincə cəlbedici rəqəmdi. Klub həm də transferdən qazanmaq istəyirsə, bu keçidə görə qınamağımız yersizdi. Əsas odu ki, Dinonun əvəzinə ondan çox da fərqlənməyən bir forvard tapılsın. Əks halda mümkün uğursuzluq fonunda Nldovu amilinin xatırlanacağı şübhəszidi. Əlbəttə, futbolçunun da qərarı bu ayrılıqda önəmli rol oynayıb. Daha yaxşı təklifi ÇL və ya AL perspektivindən üstün tutan Dino “Qarabağ”dan getdi. Lap deyək ki, “köhlən atlar” futbolçunu satmadı və onun yayda müqaviləsinin müddəti bitir. Belədə onun gedişi kluba heç nə qazandırmayacaqdı.
Maraqlıdı ki, Ndlovu son açıqlamasında “Qarabağ”dan ayrılmasının səbəbini belə izah edib: “Mən onlara dedim ki, burda xoşbəxtəm, ancaq əvvəlki kimi gənc də deyiləm. Onlar mənə yeni müqavilə təklif etməsəydilər, orda qala bilməzdim. Mənim yeni, daha yaxşı müqaviləyə ehtiyacım vardı. Ancaq onlar masanın üzərinə yeni müqavilə qoymadılar. Mən isə ləngiyə və yeni açılan fürsətin itməsinə imkan verə bilməzdim. İlk növbədə ailəmi və karyeramı fikirləşməliydim”.
Yadınızdadısa, “Qarabağ”dan ayrıldığı məlum olanda Dino karyerasını Ağdam təmsilçisinin heyətində bitirməyi düşündüyünü, lakin bunun arzu olaraq qaldığını demişdi. Bundan başqa, Ndlovu “karyeramda ən çətin qərarlardan birini verdim. Ancaq bu futboldu. Futbolçular gəlib-gedir. Düşünürəm ki, pərəstişkarlarımın ürəyinə toxunan oyunçulardan biriyəm. Qanım "Qarabağ"ı sevən və onun uğrunda həyatını itirən insanlarla axacaq" söyləmişdi.
Hücumçu ilk günlərdə ayrılığın əsl səbəbi üzərində dayanmasa da, bu dəfə daha açıq danışıb. Görünür, “Qarabağ”dan daha yaxşı maaş təklifi gözləyirmiş. Belə bir təklifin gəlməməsi isə Çini seçməsinə təsir edib. Əldə etdiyimiz məlumata görə, Dino “Qarabağ”da yarım milyon manata yaxın qazanırmış. Ancaq “Xançjou Qrintaun” daha yaxşı təfliklə futbolçunun “saqqızını oğurlayıb”. Söhbət asiyalaların ona 1 milyon dollar təklif etməsindən gedir. Belə çıxır, Dino Çində burdakından 3 dəfədən də artıq qazanacaq.
Bütün bunlar, ən əsası da Ndlovunun səsləndirdiyi fikirlərlə bağlı bir neçə futbolçunun “Qarabağ”a keçidində vasitəçi olmuş, tanınmış menecer Tural Əsgərovun fikirlərini öyrəndik: “Təəssüf ki, bu haqda çox danışa bilməyəcəm. Çünki elə şeylər var ki, mənim açıqlamaq səlahiyyətim yoxdu. Onu deyə bilərəm ki, bəli, “Qarabağ” Ndlovuya yeni təklif irəli sürməmişdi. Ancaq buna görə klubu da qınamalı deyilik. “Qarabağ” mayın sonuna kimi Dino ilə müqaviləni bir il də uzatmaq hüququna malik idi. Ən əsası, Dinonun da getmək istəyi var idi. “Qarabağ” Çin tərəfinin kluba təklif etdiyi transfer şərtlərini məqbul hesab etdi. Ona görə də futbolçunun keçidi ilə razılaşdılar. Dino da çinlilərin irəli sürdüyü çox-çox sərfəli təklifin qarşısında duruş gətirə bilmədi. Hər nə qədər onun “Qarabağ” sevgisi böyük olsa da, ÇL-də tarix yazmışdı və yenidən belə bir imkanı qalsa da, Çin klubunun təklifini qəbul etdi. Təəssüf ki, məbləği açıqlaya bilmirəm”.