Tahir Baxşıyev düşmən ölkənin komandasını güclü sayır
Gənc basketbolçular arasında Avropa birinciliklərinin püşkü atılıb. Ölkəmiz yenə 3 yaş qrupu üzrə qitə çempionatlarında təmsil olunacaq.
Elşən Yusubovun rəhbərlik etdiyi U-16 C divizionunda mübarizə aparacaq. Basketbolçularımız iyulun 3-dən 11-dək San Marinonun Serravalle şəhərində qüvvəsini sınayacaq. Komandamız A qrupunda Avstriya, Ermənistan, Albaniya, Moldova və meydan sahibləri ilə gücünü yoxlayacaq. U-18 isə B divizionunda qüvvəsini sınayacaq. Samit Nuruzadənin başçılıq etdiyi komanda iyulun 27-dən avqustun 5-dək Makedoniyanın paytaxtı Skopyedə baş tutacaq çempionatda B qrupunda yer alacaq. Burda yığmamız Belçika, Macarıstan, Estoniya, Gürcüstan və Avstriya ilə rəqib olacaq.
20 yaşadək basketbolçulardan ibarət milli də B divizionunda mübarizə aparacaq. Tahir Baxşiyevin rəhbərlik etdiyi komanda iyulun 13-22-si aralığında Bolqarıstanın paytaxtı Sofiyada təşkil olunacaq yarışın A qrupunda oynayacaq. Basketbolçularımız Belarus, Latviya, Belçika və Makedoniya ilə üz-üzə gələcək.
Dünən millilərimizin çalışdırıcıları ilə danışmaq istədik. Ancaq onlardan yalnız U-20-nin baş məşqçisi Tahir Baxşıyevlə söhbət edə bildik: “Ötən ilə baxanda, bu dəfə qrupumuz daha rahatdı. Qüvvələr nisbəti bərabərdi. Sözsüz, Latviya qrupun favoritidi. Ən azı 2-ci yeri tutub, növbəti mərhələyə yüksəlmək üçün sona kimi mübarizə aparacağıq. Əlbəttə, yarış ərəfəsində rəqibləri daha yaxından izləyəcək, videolara baxıb təhlillər aparacağıq. Yaxın günlərdə U-18-i çalışdıran Samit Nuruzadə ilə söhbət edəcəyik. Yarışa hazırlıq planını müəyyənləşdirəcəyik. Bu dəfə heyətimiz daha təcrübəli olacaq. Amerikalı legioner istisna olmaqla, komandamız olduğu kimi qalıb. Artıq B divizionunda mübarizənin necə olduğunu da görmüşük. Bu dəfə daha yaxşı çıxış edəcəyimizə inanırıq. Amerikadan 2 və ya 3 “nömrə” basketbolçu “milliləşdiriləcək”. Ola bilər, U-18-dən də bizə 2-3 nəfər qoşulsun. Bunu Samit müəllimlə söhbətdə aydınlaşdıracağıq. Bildiyiniz kimi, U-16-nın rəqiblərindən biri Ermənistandı. Onların həmin yaş qrupu üzrə komandası güclüdü. Çünki heyətlərində Amerikada yaşayan ermənilər çoxluq təşkil edir”.
SƏRXAN
