Rəqib Sloveniyaya 15 oyunçu ilə gedir
Yanvarın 10-dan Avropa çempionatının final mərhələsinin hazırlıqlarına başlayan futzal millimizin düşərgəsinə daha bir yığma üzvü qoşulub. Karyerasını Serbiyanın “Ekonomaç” klubunda davam etdirən Vitali Borisov bazar günü Bakıya gəlib. Təcrübəli fitzalçı dünən keçirilən məşq prosesində iştirak edib. Hazırda Braziliyada olan Fineo de Araujo, həmçinin Dubayın “Al Dhafra” klubunda çıxış edən Vassura isə yanvarın 18-də komandaya qoşulacaq.
Qeyd edək ki, millinin Bakıdakı təlim-məşq toplanışı yanvarın 27-dək davam edəcək. Komanda yanvarın 28-də final mərhələsinin keçiriləcəyi Sloveniyanın Lyublyana şəhərinə yola düşəcək və “Austria Trend Hotel”də məskunlaşacaq. Milli ilk oyununu fevralın 2-də Fransaya, növbəti matçını iki gün sonra İspaniyaya qarşı keçirəcək.
Bu arada millimizin AÇ-2018-in final mərhələsindəki rəqiblərindən birinin Sloveniyaya hansı heyətlə yollanacağı məlum olub. Belə ki, İspaniya yığmasının yekun heyəti açıqlanıb. Baş məşqçi Xose Venansio Lopes yanvarın 30-da start götürəcək yarışın hazırlıqlarına 15 futzalçı ilə davam edəcək. D qrupunda Azərbaycan və Fransa ilə qarşılaşacaq pireneylilər Sloveniyadakı turnir üçün yekun heyəti artıq UEFA-ya təqdim ediblər. 10 oyunçudan imtina edən Lopesin siyahısında 3 qapıçı, 3 müdafiəçi və 9 hücumçu yer alıb: qapıçılar - Xesus Errera, Pako Sedano, Karlos Barron; müdafiəçilər - Rafael Qarsiya Bebe, Mark Tolro, Karlos Ortis; hücumçular - Adrian Alonso, Adolfo Fernandes, Xoselito Fernandes, Serxio Lozano, Migel Sayaqo, Anxel Velasko, Fransisko Xavyer Solano, Aleks Yepes, Rafa Usin.
Qeyd edək ki, qrup mərhələsinin son turunda keçiriləcək İspaniya - Azərbaycan oyunu fevralın 4-də baş tutacaq.
MİRAĞA