Namiq Quliyev Sloveniyaya yox, Türkiyəyə gedəcək
Futzal millimiz Avropa çempionatına hazırlığı davam etdirir. Məşqlərə yanvarın 10-dan başlayan komanda üzvləri iki gün sonra tam heyətlə hazırlaşa biləcək. Baxmayaraq ki, Vitali Borisov artıq dünən Bakıya dönüb. Fineo ayın 17-də, Vassura isə ertəsi düşərgəyə qoşulacaq. Futzal yığmamız məhz ayın 18-dən toplanış məqsədilə Bayıla köçəcək və 27-nə qədər orda məskunlaşacaq.
Artıq komandanın səfər planları bəllidi. Milli Sloveniyaya yanvarın 28-də günorta saatlarında yola düşəcək. Bakı – İstanbul - Lyublyana reysi ilə hərəkət edəcək komandada 21 nəfər yer alacaq ki, bunlardan 14-ü futzalçı heyəti, 7-si isə məşqçi korpusunun üzvləri və texniki işçilər, həmçinin rəhbərlikdən olacaq. O da bəllidi ki, Joze Alesio da Silvanın gəlişindən sonra özünə köməkçi götürdüyü fiziki hazırlıq üzrə məşqçi Namiq Quliyev Lyublyanaya getməyəcək. PFL rəhbərliyi Futzal Federasiyasından xahiş edib ki, ADBTİA-nın müəllimi Sloveniyaya yox, hakimlərlə Antalyaya getsin. Zaur Axundov buna etiraz etməyib. Millinin final mərhələsi müddətində Lyublyanada “Austria Trend Hotel”də qalacağını da qeyd edək.
MİRAĞA