Famil Ağayev: “Həlledici məqamlarda təcrübə, ustalıq səviyyəsi ortaya çıxır”
“Çağırış” kuboku
AZƏRREYL – Ştiinta (Rumıniya) 3:0 (25:23, 27:25, 25:14, “qızıl” set – 13:15)
Azərreyl: Yekaterina Jidkova – 23, Svetlana Dorsman – 11, Anna Dovqopolyuk – 9, Aynur Kərimova – 6, Viktoriya Ağakişiyeva – 5, Maqdalena Qrika – 5, Kristina Yaqubova – 2, Valeriya Məmmədova (l), Ceyran Əliyeva, Leyla Parşkova, Nərmin Fərəcova, Nelli Salbişvili, Ayşən Abduləzimova, Şəfaqət Həbibova.
Baş məşqçi: Famil Ağayev.
Ştiinta: Adriana Roqoyinaru – 14, Ana Kristina Kazaku (12), Anamariya Lupa – 9, Georgiana Fales – 7, Loredana Filipas – 6, Melinda Sipos – 3, Mihaela Albu (l), Kristina Radu, Alexandra Kiuku, Lorena Raisa Kiokian, Aleksandra Kapelovies, Anamariya Berdila.
Baş məşqçi: Florin Qrapa.
Hakimlər: Teodora Kiriopulo (Yunanıstan), Milan Nikoliç (Bosniya və Hersoqovina).
9 yanvar. Bakı. Dərnəgül Voleybol Mərkəzi. 1200 tamaşaçı.
Oyunun vaxtı: 106 dəqiqə (31+32+23+20).
Çərşənbə axşamı Dərnəgül Voleybol Mərkəzində dramatik oyun reallaşdı. Halbuki “Ştiinta”nın baş məşqçisi Florin Qrapa görüşün bu məcrada baş tutacağını proqnozlaşdırmırdı. “Çağırış” kubokunun 1/16 final mərhələsinin cavab oyununa rahat çıxan rumınların çalışdırıcısı bütün xırdalıqları nəzərə aldığını və “Azərreyl”in qələbə qazanmasının müşkül olduğunu söyləmişdi. Ancaq təcrübəli mütəxəssis iki saata yaxın davam edən görüşdə böyük həyəcan və əsəb keçirdi.
“Dəmiryolçular”ın əleyhinə olan məqamlar çox idi. Oyun praktikasının çatışmazlığı, voleybolçuların müxtəlif klublardan icarəyə götürülməsi, Ayşən Abduləzimovanın zədələnməsi və s. Bütün çətinliklərə baxmayaraq, Famil Ağayev komandanı 1:3-ün əvəzini çıxmağa kökləyə bilmişdi. İlk iki setdə arenanın yarıdan çoxunu dolduran azarkeşlər gərgin mübarizə izlədi. Hərçənd ilk setə rumınlar çox yaxşı başladı. İlk texniki fasiləyə 4 xal öndə yollanan “Ştiinta” daha sonra üstünlüyünü daha da artırdı. Kristina Yaqubovanın zəif oynadığını görən Ağayev onun yerinə Maqdalena Qrikanı meydana buraxdı. Hesab artıq 9:17 idi. Qonaqlar ilk seti qazanacaqlarını düşünürdülər ki, təmsilçimiz möhtəşəm geridönüş etdi. Məhz Qrikanın uğurlu servisləri fonunda fərq əridi. Ardınca düzgün bloklar ilk seti qazanmağa imkan verdi. Özünəinamı artan “Azərreyl” ikinci setin ortalarından təşəbbüsü ələ keçirdi. Düzdü, qonaqlar mübarizədən qopmadı. Ancaq Yekaterina Jidkovanın məhsuldarlığı həlledici oldu. Yığma üzvü təkcə bu setdə hesabına 9 xal yazdı. 3-cü setdə qonaqların işi əvvəldən yolunda getmədi. Baş məşqçi “quru” məğlubiyyətin qaçılmaz olduğunu görüb, setin ortalarında əsas heyətin 3-4 üzvünü kənara çıxardı. Məqsəd “qızıl” set ərəfəsində onlara istirahət vermək idi. Hər halda, Qrapanın bu taktikası işə yaradı. Düzdü, bunda Ağayevin komandasının “köməyi” rol oynadı. Axı, əlavə setdə yalnız axmaq oyun nəticəsində 10:5-lik üstünlüyü əldən vermək olardı. Sanki komanda arxayınlığın güdazına getdi. Maraqlıdı ki, bunadək oyunu yüksək səviyyədə keçirən Valeriya Məmmədova və Yekaterina Jidkova ardıcıl 2 epizodda anlaşmazlıq yaşadı. Uşaq səhvlərinin nəticəsində “Ştiinta” əlavə setdə geridönüş edib, Rumıniyaya şad-xürrəm yollandı. “Azərreyl” isə bundan sonra diqqətini ölkə çempionatına ayıra bilər…

Reaksiyalar
Famil Ağayev, “Azərreyl”in çalışdırıcısı: “Cavab matçını çox yaxşı oynadıq. Oyunu demək olar ki, səhvsiz keçirdik. Ancaq “qızıl” setdə sanki komandaya nəsə oldu. İlk 3 setdə etmədikləri səhvlərə yol verdilər. Leyla Parşkovanı libero olduğu üçün meydana buraxdım. Amma o da topun qəbulunda səhvə yol verdi. Bax, belə həlledici məqamlarda təcrübə, ustalıq səviyyəsi ortaya çıxır. Etiraf edək ki, komandamızın səviyyəsi yetərincə yüksək deyil”.
Florin Qrapa, “Ştiinta”nın baş məşqçisi: “Rəqibimiz çox güclü idi. Açığını deyim ki, “qızıl” setdə qalib gələcəyimizə inanmırdım. “Azərreyl” əlavə setə də üstün başladı. 5:10 hesabı ilə geridə olarkən artıq inamımı itirmişdim. Lakin komandam toparlanmağı bacardı və sonadək döyüşərək gözəl oyun nümayiş etdirdi. Fikrimcə, “Azərreyl”in voleybolçuları artıq qalib gəldiklərini düşünməyə başlamışdılar. Bu arxayınlıq onlara problem yaratdı. “Çağırış” kubokunda mümkün qədər uzağa getməyə çalışacağıq. Ancaq əsas diqqətimizi Rumıniya çempionatına yönəltmişik. Komandamız yenilənmiş heyətə malikdi. Ötən mövsümdən cəmi 4 voleybolçu qalıb, qalanları yeni oyunçulardı”.
Adriana Roqoyinaru, “Ştiinta”nın kapitanı: “Rəqibimiz çox güclü idi və iki komanda arasında çox gözəl, maraqlı mübarizə getdi. Cavab qarşılaşmasında uduzduqdan sonra qalib gələcəyimizi düşünmürdüm. “Qızıl” setdə 5:10 hesabı ilə geri düşdükdə inamımız çox az idi. Amma biz bunu bacardıq”.
SƏRXAN