Millidə çalışanların maaşları artırıldı
U-19-da Vüqar Məmmədin köməkçisi olan Mübariz Orucovun “Sumqayıt”da Samir Abasovun köməkçilərindən biri kimi çalışmaq perspektivinin olduğunu ötən saylarımızın birində xəbər vermişdik. Lakin sonradan redaksiyamızla əlaqə saxlayan Mübariz bəy bu izdivacın baş tutmayacağını bildirdi. Səbəb isə AFFA rəhbərliyinin müxtəlif yaş qrupu üzrə millilərdə çalışan mütəxəssislərin yalnız bir yerdə işləməsinə icazə verməsidi.
Etibarlı mənbədən əldə etdiyimiz məlumata görə, müxtəlif yaş qrupları üzrə yığmalarda baş tutan son islahatlardan sonra yığmaların məşqçilər korpusunda yer alan mütəxəssislərin və inzibati heyətin əməkhaqqı artırılıb. Bununla bağlı bizə məlumat ötürən mənbənin sözlərinə inansaq, ötən seçmə mərhələdə köməkçi məşqçilərin maaşı 700-800 manat civarında idisə, dəyişikliklərdən sonra onlar 1700 manat alacaqlar. İnzibatçıların isə əməkhaqqı 800 manat təşkil edəcək ki, ötən illərdə bu məbləğ 300-500 manat aralığında dəyişirdi.
Onu da qeyd edək ki, AFFA-nın “bir yerdə işləmək” qərarı təkcə Orucova şamil olunmayıb. “Zirə”də Ayxan Abbasovun köməkçilərindən olan Zaur Həşimov da “qartallar”ın düşərgəsindən ayrılıb. Xatırladaq ki, Həşimov U-18-in baş məşqçisidi. Bakıətrafı qəsəbə təmsilçisinin mətbuat katibi Elmar Abdullazadə bizimlə söhbətdə Zaur bəyin klubdan ayrıldığını təsdiqlədi. Onun yerinə isə hələ təyinat gerçəkləşməyib.
RƏŞAD