"Araz"ın və futzal millimizin planında dəyişiklik baş verib. İlkin plana əsasən hazırlığa Naxçıvan klubu yanvarın 8-dən, yığma isə 18-dən başlamalı idi. Ancaq Joze Alesio da Silva klubu üçün 3 günlük məşqləri məqbul sayıb və ölkənin əsas komandasına daha çox vaxt ayırmağı lazım bilib. Beləliklə, yığma dünəndən bir araya gəlib. Əslində toplanış elə ayın 18-dən başlayacaq və komanda həmin gün tam heyətlə "Bayıl Arena"da məskunlaşacaq. Artıq heyət açıqlanıb. Braziliyalı mütəxəssis Avropa çempionatının final mərhələsinin oyunlarına hazırlıq üçün 15 futzalçıya dəvət göndərib. O, yanvarın 27-dək davam edəcək təlim-məşq toplanışında Rövşən Hüseynli, Rizvan Fərzəliyev, Eduardo, Qallo, Ramiz Çovdarov, Tyaqo, İsa Atayev, Anar Məmmədov, Xətai Bağırov (hamısı “Araz”), Samir Həmzəyev, Emin Kürdov, Namiq Məmmədkərimov (hamısı "Ekol"), Vassura (“Al Dafra”, BƏƏ), Fineo (“Aqleymina Hamamatsu”, Yaponiya) və Vitali Borisovu (“Ekonomaç”, Serbiya) sınayacaq. Ancaq Vitali, Fineo və Vassura komandaya yanvarın 18-də qoşulacaq. Dünənki məşq Bakı İdman Sarayında baş tutsa da, milli növbəti üç gün ərzində "Olimpik Star"ın xidmətindən yararlanacaq.
MIRAĞA