Kinorejissor Tahir Tahiroviç futbola da biganə deyil.

“Football-plus.az” xəbər verir ki, o, “Neftçi”nin sabiq baş məşqçisi, mərhum Böyükağa Hacıyevlə bağlı maraqlı xatirəsini paylaşıb: “Böyükağa Hacıyevlə (Zəif) Naxçıvanda bir məhəllədə yaşayırdıq. Böyük Bağda tez-tez görüşüb söhbət edərdik. Onunla bağlı bir hadisə yadıma düşdü.

2000-ci illərin əvvəlləri idi. Böyükağa Hacıyevi “Araz”ın baş məşqçisi təyin etmişdilər. Yuxarılar Böyükağa Hacıyevin təyinatını o qədər də istəmirdilər. Çünki rəhmətlik Zəif sözün düzünü deyən adam idi. Buna görə də “Araz”ın prezidenti vəzifəsinə bilərəkdən onunla yola getməyən bir adamı təyin etdilər.

Naxçıvan stadionunun yanında "İsoşun çayçısı" deyilən bir yer var idi. Mən içəri daxil olanda Zəiflə klub prezidentinin masa arxasında mübahisə etdiklərini gördüm. Vücud baxımından yekəpər olan prezident həm də boksçu idi. Zəif onu başa salmaq istəyirdi ki, futbol nə olan şeydi. O da iki dəqiqədən bir Zəifə deyirdi ki, mən heç nə bilmirəm, rəhbərlik nə tapşırıb, onu edəcəm. Zəif əsəblərinə hakim olmayıb, onu bayıra dəvət etdi. Hiss olunurdu ki, artıq bunlar əlbəyaxa savaşacaqlar. Nəzərə alsaq ki, prezident boksçu idi, onun Zəifi vuracağını təxmin edirdik. Zəif mübahisədən əsəbləşərək, sağ əli ilə prezidentin qulağının dibinə bir sillə vurdu. Prezident yerində səndələdi. Elə bu an Zəif sol əli ilə daha bir sillə vurdu. Prezident dala-qabağa gedən an Zəif qarşısındakı şəxsin çənəsinin altından bir yumruq ilişdirdi. Prezident yerə yıxıldı. Çayçı İsoş səsi eşidərək özünü bayıra atdı. Prezidentin ağız-burnunun qana boyandığını görüb, dəsmalı ilə sildi. Zəif isə kənarda əlini üzünə tutub, qəhqəhə ilə gülürdü. Bunu görən İsoş Zəifin üstünə “nəyə gülürsən” deyə qışqırdı. Zəif isə ucadan belə cavab verdi: "Ə İsoş, bu qurumsaq nə təhər boksçudu ki, mənə cavab verməməyi bir tərəfə, heç olmasa, blok saxlayardı daaa".