Xətai Bağırov yeganə xal itkisinin sirrini açıqladı
Gözlənildiyi kimi, mövsümün ilk yarısını lider tamamlayan “Araz” qış hazırlığına da hamıdan erkən başladı. Belə ki, Naxçıvan təmsilçisi dünən bərpa məşqlərinə start verdi. Çalışmalara baş məşqçi Joze Alesio da Silva özü rəhbərlik edir. Braziliyalı mütəxəssis vətənindən şənbə günü dönüb. Bu yerdə bir məqamı vurğulayaq. Alesio əvvəlki illərdə adətən Bakıya deyilən vaxtdan gec qayıdır, müxtəlif bəhanələrlə bir-iki gün “xaltura” edirdi. Görünür, qarşıda ciddi sınaq olduğunu onun diqqətinə çatdıran Futzal Federasiyası məşqçiyə qəti xəbərdarlıq edib. Komanda məşqlərə tam heyətlə başlayıb. Braziliyalılar Eduardo, Tyaqo və Qallo yeni il tətilini Braziliyada yox, yaxın məkanlarda keçirdiklərindən Bakıya da erkən dönüblər.
“Araz” 3 gün Bakı İdman Sarayında bərpa məşqi keçəcək. Dünənki məşq saat 16.00-da başlayıb və 2 saat davam edib. Komanda ayın 10-dan sonra müxtəlif məkanlara üz tutacaq. İlk mərhələdə “topu hiss edəcək” komanda növbəti bir həftə fiziki çalışmalara üstünlük verəcək ki, bu məqsədlə ADBTİA, eləcə də “ABU Arena” uyğun bilinib. Fiziki məşqləri təcrübəli mütəxəssis Namiq Quliyev keçəcək.
Bu arada “Araz”ın və millinin üzvü Xətai Bağırov Futzal Federasiyasının rəsmi “feysbuk” səhifəsinə müsahibə verib. Təcrübəli futzalçı maraqlı məqamlara toxunub, “Neftçi” ilə oyundakı xal itkisinin sirrini açıqlayıb.
- “Araz”ın ilk dövrədəki çıxışını necə dəyərləndirirsən?
- Fasiləyə zirvədə yollanmışıqsa, deməli, istəyimizə nail olmuşuq. “Neftçi” ilə birinci dövrədə baş tutan qarşılaşmaya yaxşı hazırlaşmamışdıq. Buna görə də xal itkisi ilə üzləşdik. Qalan oyunların hamısında qalib gəlmişik.
- “Neftçi” ilə görüşdə yaxşı hazırlaşmamağın, yoxsa saymazyana yanaşmanın güdazına getdiz?
- Yaxşı hazırlaşmamışdıq. Əvvəlki turda qırmızı vərəqə alıb cəzalı duruma düşən, zədə üzündən qarşılaşmanı buraxan oyunçularımız var idi. Bu amillər təsirini göstərdi.
- Demək olar ki, “Araz” bu məsafəni birnəfəsə qət etdi?
- Nəyi demək istədiyini anladım. Heç nə asan olmadı. Çətinlik çəkdiyimiz oyunlar da oldu. Əvvəlki kimi rahat oynaya bilmirik. Məsələn, ötən il əksər qarşılaşmalarda 10-15 qol vururduq, indi buna az nail oluruq. Olanda belə, oyun birtərəfli keçmir. Komandalar bu il yaxşı hazırlaşıb. Bu da nəticələrdə özünü göstərir.
- Hansı komandanı güc baxımından “Araz”a yaxın hesab edirsən?
- Bu, komandanın oyuna hazırlaşmağından asılıdı. Məsələn, “Neftçi” bu mövsümü yaxşı keçirmir, amma bizimlə görüşdə əla çıxış etdi, nəticə də qazandı. Halbuki ikinci pillədə yer alan “Marafon”du və hər iki qarşılaşmada onları udmuşuq. Yenə deyirəm, burda əsas məqam oyuna hazırlıqla bağlıdı.
- Turnir cədvəlinin bu şəkildə qurulacağını düşünürdün?
- Gözlədiyim kimi deyil. Birincisi, özümüz 100 faizlik nəticə qazanmamışıq. “Ekol”un, “Neftçi”nin üst sıralarda yer alacağını düşünürdüm, ancaq debütant “Marafon” onları qabaqladı. Halbuki “Marafon”dan bu nəticəni gözləmirdim. Belə olması onun göstəricisidi ki, çempionatda rəqabət artıb. Yeni gələn komandalar yarışa maraq qatıb. İstərdim iştirakçı komandaların sayı 10 olsun, tura yaxşı hazırlaşaq və bu, UEFA kubokundakı çıxışımıza müsbət mənada təsir etsin. Meydana çıxanda rəqibin təhlükəli olduğunu hiss edirsənsə, deməli, matç gərgin və maraqlı keçəcək. Bunu hiss etdirəcək komandaların sayının çox olmasını istərdim.
- Hazırkı səviyyə qane etmir?
- Cari mövsümdəki gərginlik, oyunlarda sürətin bir qədər artmasını hiss etdik. Düzdü, “Araz” ilk dəfə UEFA kubokunda mübarizəni bu mərhələdə dayandırdı. Ancaq çempionat zamanı ciddi hazırlıq keçməyimizin bəhrəsini meydanda hiss edirdik.
- Avropa çempionatının final mərhələsinin oyunlarına az vaxt qalıb. Əvvəlcə rəqiblərlə bağlı fikrini öyrənmək istərdik.
- İspaniyadan başlayım. Çempionatın ən güclü komandası bizimlə bir qrupa düşüb. Dəfələrlə Avropa, dünya çempionu olublar. Yəni onlar hansı çempionata qatılırsa, o yarışın favoritidilər. Fransanın timsalında ilk dəfə bir komanda birinci mərhələdən final oyunlarına qədər yüksəldi. Deməli, bu ciddi siqnaldı. Xorvatiya kimi komandanı udublar. Halbuki Xorvatiya hər zaman bizi incidən rəqib olub.
- Bu dəfə qrup oyunlarına nisbətən zəif rəqiblə başlaycaqsız. Təqvimi üstünlük saymaq olar?
- Qrupdan çıxmaq məsələsini birinci oyunda həll etmək olar. Bunu etdikdən sonra ispanlarla qarşılaşmaya yaxşı hazırlaşmaq mümkündü. Məncə, məsələni ilk matçda həll edəcəyik.
- Əvvəlki illərlə müqayisədə millinin bir qədər zəif təsir bağışladığı fikri ilə razılaşırsan?
- Milli zəif deyil. Hər şey hazırlıqdan asılı olacaq. Bayaq “Neftçi” nümunəsini elə-belə çəkmədim. İranda keçirilən turnir də göstərdi ki, oyuna lazımi qaydada hazırlaşan komanda məqsədinə çatır.
- Yeri gəlmişkən, fasilə müddətində “Araz” 3 braziliyalı futzalçı ilə yollarını ayırdı. Bu komandanın zəifləməsinə səbəb ola bilərmi?
- Komanda zəifləməyəcək, əksinə, güclənəcək. Gedənlər yaxşı oyunçulardı, ancaq hazırkı heyətimizdə onları əvəzləyəcək futzalçılarımız var. Onların yeri görünməyəcək.