“Bu turnir pandemiyadan sonra ölkəmizdə baş tutacaq ən önəmli və genişmiqyaslı yarışlardan biri olacaq. Ölkəmiz böyük idman tədbirlərinə evsahibliyi edir. Dünya çempionatının Bakıda keçirilməsi dövlətin və idmansevərlərin marağındadı. İndiyə qədər belə yarışları televiziyalardan izləyirdilər. Sevindirici haldı ki, bu il yerli tamaşaçılar beynəlxalq əhəmiyyətli yarışı öz ölkəsində izləyəcək. Bu həm də ölkəmizin idmana və idman siyasətinə verdiyi önəmin təzahürüdü. Turnirdən sonra xeyli sayda azərbaycanlının taekvondaya və ya digər idman növlərinə həvəsi artacaq. Mundial beynəlxalq federasiya üçün də önəmlidi. Qurumun Bakıda gerçəkləşəcək 50 illik yubileyində dünya taekvondosunda gözlənilən yeniliklərlə bağlı mühüm qərarlar qəbul ediləcək. Bu yaxınlarda Azərbaycan Taekvondo Federasiyasının prezidenti Kəmaləddin Heydərovun rəhbərliyi ilə Təşkilat Komitəsinin iclası keçirilib. Toplantıda yeniliklərlə bağlı danışılıb, iş planı müzakirə edilib, çempionat ərəfəsində baş tutacaq tədbirlər barədə məlumat verilib. Dünya çempionatları tarixində ilk dəfə 145 ölkədən 986 taekvondoçu gücünü sınayacaq. Ümumilikdə 190 ölkədən 2000-ə yaxın qonağın qatılacağı gözlənilir. 16 çəkidə qaliblər müəyyənləşəcək. Turnirin qalibi hesabına 140 reytinq xalı əlavə edəcək”.