Oyunların nəticələrinin manipulyasiyasında təqsirləndirilərək futboldan ömürlük uzaqlaşdırılan Mirhüseyn Seyidovla Nizami Hacıyevə “İnter”lə “Neftçi”də işləmiş metodist-məşqçi Ağakişi Mehdizadə də qoşuldu. Araşdırmalar nəticəsində hələ ki adları çəkilənlərin günahı sübuta yetirilsə də, baş katib Elxan Məmmədovun sözlərindən belə çıxır ki, dalğanın davamı gözlənilir.
Qərarda ömürlük cəzaya məruz qalanların 15 gün ərzində apellyasiya şikayəti vermək hüqüquna sahib olduqları da qeyd olunmuşdu. Yəni qərarla razılaşmayanlar cəzanın yüngülləşdirilməsi, ya da ləğvi üçün ortaya tutarlı əsaslar qoymalı və həmin sənədi AFFA-ya təqdim etməlidi. Dekabrın 1-də İntizam Komitəsinin çıxardığı qərarın üstündən bu gün bir həftə keçir. Maraqlıdı, cəzaya məruz qalanlar apellyasiya şikayəti verib? Ümumiyyətlə, belə bir niyyətləri var? Nizaminin telefonu qapalı olduğundan, onunla danışmaq mümkün olmadı. Əvəzində Mirhüseyn dəstəyi qaldırdı: “Bəli, apellyasiya şikayəti vermək istəyirəm. Həyatımı futbola həsr etmişəm, bacardığım yeganə iş budu. Ailəmi də futboldan qazandığım pulla dolandırıram. Kənarda qalsam, nə iş görəcəm? Ona görə də AFFA-ya müraciət etmək fikrim var. Növbəti həftənin bazar ertəsi, uzağı çərşənbə axşamı apellyasiya şikayəti verəcəm”.
HƏBİB