“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Bu dəfə diqqətlərimizi “Şamaxı”ya yönəltmişik. “Şamaxı” Misli premyer-liqasında heyətində legioner olmayan yeganə komandadı. Buna baxmayaraq, “şirlər” bir çox iddialılarla başabaş mübarizə aparmağa çalışır, elitadakı yerini qorumaqda iddialı görünür. Sözsüz, bu uğurda gənc mütəxəssis Cavid Hüseynovun da böyük rolu var. Onunla söhbətdə həm “Şamaxı”nın heyətindəki gənclərin çıxışına toxunduq, həm də Azərbaycan futbolunun bugünündən və sabahından danışdıq.

- Cavid bəy, əvvəlcə sizi salamlayır, mövsümün qalan oyunlarında uğurlar arzulayıram. “Şamaxı” premyer-liqada yeganə klubdu ki, bütünlüklə yerlilərə güvənir. Rəhbərlik bu qərarı verəndə legionersiz oynamaqdan çəkinmədiz?
- Mən də sizi salamlayır, diqqətinizə görə təşəkkür edirəm. Bəli, düzgün vurğuladız, bizim komanda elitanın yeganə təmsilçisidi ki, heyəti bütünlüklə yerli futbolçulardan ibarətdi. Bu barədə hələ “Şamaxı”da işləmək təklifi alanda rəhbərliklə danışıb, müzakirələr aparmışdıq. Komandanın strategiyası, istiqaməti məhz bu yöndədi. “Şamaxı”da işə başlayarkən əsas işimizin nə olacağını bilirdim. Rəhbərlik bildirmişdi ki, bizdən nəticə tələb olunmayacaq. Milli komandalarımız üçün futbolçu yetişdirməyi hədəfləmişik. Bu istiqamətdə rəhbərliklə baxışlarımız üst-üstə düşür. Legionersiz oynamaq bizim üçün müəyyən çətinliklər yaradır. Hər bir məşqçi istəyər ki, komandasında yaxşı legionerlər olsun. Bir çox mövqelər var ki, orda təcrübəli legionerlərə ehtiyac duyuruq. Amma hər bir çətinliyə sinə gərmişik. Şükürlər olsun ki, oyunumuzda əməlli-başlı inkişaf var. Bu yüksəlişi nəticəyə çevirə biləcəyimizə, turnir cədvəlində də irəliləyəcəyimizə inanıram.

- Komandanın hazırkı çıxışı, nəticələr sizi qane edirmi? Xüsusən də yerli gənclərin oyunu sizi qane edirmi?
- Hazırkı çıxışımıza, durumumuza iki istiqamətdən yanaşardım. Biz komandanı formalaşdıranda müxtəlif fikirlər var idi. Düşünürdülər ki, böyük hesablı məğlubiyyətlərə uğrayacıq. Müəyyən mənada həmin düşüncə sahibləri də haqlı idi. Belə fikirlər var idi ki, yerli futbolçulardan ibarət komanda formalaşdırmaq asan deyil, inkişafa nail ola bilməyəcik, nəticə olmayacaq. İstər mətbuatda, istərsə də futbol ictimaiyyətinin nümayəndələri ilə söhbətlərimizdə belə fikirlər eşidirdik. Həqiqətən də biz çox əziyyət çəkmişik. Bu gün göstərdiyimiz oyun göz qabağındadı. Əlbəttə, müəyyən vacib məqamlarda fərdi keyfiyyətlər ön plana çıxır. Tətbiq etmək istədiyimiz oyun sistemində fərdi keyfiyyətlər həlledici rol oynayır. Etiraf edirəm ki, bu yöndə axsayırıq. Bu istiqamətdə çalışırıq, istəyirik ki, gənc futbolçuların fərdi keyfiyyətləri də yüksəlsin. O ki qaldı turnir cədvəlindəki yerimizə, bundan heç də razı deyilik. Oynadığımız çox yaxşı oyunlar var ki, orda qələbə qazanmalıydıq, amma xal itirmişik. Gənclərimiz əlindən gələni ən yaxşı formada etməyə çalışırlar. Zamanla daha yüksək yerlər uğrunda mübarizə aparacağımıza inanıram.



- Heç olub ki, komandada legionerin olmasını arzulamısız, düşünmüsüz hansısa oyunda bir-iki legioner olsaydı, qələbə qazana bilərdik...
- Əlbəttə, belə oyunlar olub. Deyim sizə necə hallarda bunu düşünmüşəm. Təbii, yerli futbolçularla oynamaq çox xoşdu. Mən ilk məşqçiyəm ki, peşakar karyerama yerli futbolçularla çıxmışam. Hər söhbətimdə bunun qürurverici olduğunu vurğulamışam. Amma bəzən oyun zamanı ürəyimdən hansısa epizodik hiss keçir ki, bu anda heyətimizdə iki sürətli, oyunu üzərinə götürə bilən legioner olsaydı, bəlkə də biz bu gün beşinci və ya altıncı yerdə rahatlıqla qərarlaşa bilərdik. Amma az öncə qeyd etdiyim kimi, bizim öz yolumuz var, bu yolla irəliləməkdə israrlıyıq.

- İstərdiz ki, başqaları da “Şamaxı”dan nümunə götürsün və elitada yerlilərin sayı artsın? Ümumiyyətlə, yaxşı yerli futbolçuların sayını yetərli sayırsızmı?
- Bu məsələyə fərqli yanaşmalar var. İndiki vəziyyətdə 10 komandamızın hamısı yerli futbolçularla oynasa, inkişaf əldə edəcəyimizi düşünmək yanlış olar. Amma komanda sayı daha çox olsa, 2-3 komanda yerlilərlə oynayar, bu da futbolumuzun inkişafını, yerlilərin daha çox şans qazanmasını düşünən insanları sevindirər. Yalnız yerli futbolçularla oynamaqla inkişaf etmək olmaz. Legionerlər də olmalıdı. Büdcəsi, iddiaları imkan verən klublarımız avrokuboklara qatılmaq, orda ölkəmizi layiqincə təmsil etmək üçün oynayır. Beş klubumuz premyer-liqada yerini qorumaq üçün mübarizə aparır. Hər klubun özünün strategiyası var, bu da əvvəlcədən müəyyənləşir. Ondan sonra da buna uyğun heyət formalaşır. Etiraf etməliyik ki, səviyyəli yerli futbolçuların sayı yetərincə deyil. Bu günün reallığı belədi.

- Son sualım “Şamaxı”nın aşağı yaş komandaların durumu ilə bağlıdı. Ordakı uşaqlara baxanda gələcək haqda nə düşünürsüz? Layiqli əvəzedicilər yetişirmi?
- Uşaq komandalarında yaxşı futbolçu yetişdirə bilmək üçün əvvəlcə məşqçilərimiz yetişməlidi. Elitada niyə əziyyət çəkirik? Çünki futbolçular intellektual səviyyədə geri qalır, qərarlar gec verirlər. Gənclərimiz bir çox cəhətdən geri qalır. Bu gün futbolçuya tapşırıq verməliyik ki, o da onu yerinə getirsin. Amma məcbur oluruq ki, hər şeyə əlifbadan başlayaq. Bunu təkcə “Şamaxı”ya aid etmək olmaz, ümumi vəziyyətimiz belədi. Uşaqların futbola böyük həvəsi var. Məni də sevindirən odu ki, bizim uşaqlar beynəlxalq turnirlərə yollanır, orda təcrübə qazanırlar. Təkcə “Şamaxı”da yox, bütün klublarımızda uşaq futbolu ilə bağlı problemlər var. Təəssüf ki, bu sahədə vəziyyət ürəkaçan deyil. Milli komandanın səviyyəsinə yüksələn futbolçularımızın olması bizim işimizin nəticəsi də olacaq. Qarşımızdakı hədəf budu və bu istiqamətdə çalışırıq.

İLKİN SULTANLI



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.