“Ağ-qaralar” “Çelsi”ylə əməkdaşlıq edəcək
“Çelsi”nin baş məşqçisi Antonio Kontenin oyunöncəsi son məşqin Olimpiya stadionunda yox, “Bakcell Arena”da keçirilməsinə razılıq verməsi “Neftçi” rəsmiləri üçün göydəndüşmə olub. Bildiyiniz kimi, 8-ci kilometr qəsəbəsindəki arena “Neftçi”yə təhkim olunub. Və “Çelsi”nin orda hazırlıq keçməsi üçün razılığı da “ağ-qaralar”a rəhbərlik edənlər verib.
Fürsətdən istifadə edən klub prezidenti Orxan Hüseynzadə ilə vitse-prezident Elnur Eyvazov "Bakcell Arena”da qonaq olan London klubunun katibi Devid Bernard və Antonio Konte ilə görüşüb. Klub rəsmiləri akademiyalar arasında əməkdaşlıq perspektivləri ətrafında fikir mübadiləsi aparıblar.
Ölkənin ən köklü klubunda uşaq futbolunun inkişafına xüsusi əhəmiyyət verildiyini qonaqların nəzərinə çatdıran Orxan Hüseynzadə "Neftçi” Futbol Akademiyasının istedadlı yetirmələrinin "Çelsi”də təcrübə toplaması üçün İngiltərə təmsilçisinin nümayəndələrinə təklif irəli sürüb. Devid Bernard prezidentin təklifini müsbət dəyərləndirərək, belə əməkdaşlığın faydalı olacağını vurğulayıb. Lakin bütün bunlar şifahi danışıq olaraq qalıb. Yəni rəsmi əməkdaşlıq müqaviləsi bağlanmayıb. Belə deyək, klub rəsmiləri bir-biriylə tanış olmaq imkanı qazanıblar.
"Neftçi”nin vitse-prezidenti Elnur Eyvazov dünya şöhrətli klubu qonaq etməkdən məmnunluğunu bildirib. Qonaqpərvərliyə görə təşəkkür edən Antonio Konte "Bakcell Arena”dakı məşqin təşkilindən razı qaldıqlarını söyləyib. Görüşün sonunda tərəflər bir-birinə xatirə hədiyyələri təqdim ediblər.
HƏBİB