Nizami də Raufun aqibətini yaşayacaq?
“Keşlə”nin aparıcı futbolçularından sayılan Nizami Hacıyevin “Neftçi”yə keçidi an məsələsidi. Tərəflər arasında danışıq da olub, razılıq da. Bircə qalır “ağ-qaralar”ın qarşı tərəfə rəsmi müraciət etməsi, ardınca da “Keşlə”nin cavabı. Artıq indidən demək olar ki, heç bir problem olmayacaq və illərdi göy-ağ formada görməyə alışdığımız Nizami yanvardan sonra “Neftçi”nin formasını geyəcək.
Bu söhbət indi yox, bir il, lap elə 3-4 ay əvvəl olsaydı, klubun Müşahidə Şurasının rəhbəri Zaur Axundov Hacıyevi yanına çağırıb “dişinin dibindən çıxanı” deyərdi. Axundovun hazırda Albaniyada legioner həyatı yaşayan Rauf Əliyevlə “atışması” yazdınızdan çıxmayıb ki. Ancaq indi vəziyyət fərqlidi. “Keşlə”yə qoyulan transfer qadağası bir aydan sonra başa çatacaq. Belədə klub baş məşqçinin istədiyi futbolçuların cəlb olunması ilə bağlı çətinlik yaşamayacaq. Zaur bəy yaxşı dərk edir ki, Nizami kimi ərköyün futbolçunu məcbur oynatmaq olmaz. Hətta müqaviləsinin müddəti yaya qədər nəzərdə tutulsa belə, futbolçu “Neftçi”yə keçmək üçün əlindən gələn hər şeyi edəcək. Ona görə də Hacıyev “Zirə” ilə qarşılaşmadan sonra jurnalistlərlə ayaqüstü söhbətdə özünəəmin şəkildə klubunu dəyişəcəyini gizlətmədi. Üstəlik, Tərlan Əhmədovun çox istədiyi oyunçulardandı.
Futbolçu istəyinə çatacaq, bu öz yerində. Amma hansı şərtlərlə? Kapitanın müqaviləsinin müddəti davam etdiyinə görə “Keşlə” həmşəhərlilərindən transferhaqqı tələb edəcək? Yoxsa Nizaminin əvvəlki adı “İnter” olan klub üçün etdikləri nəzərə alınıb, onun önündə “yaşıl işıq yandırılacaq”? Bəlkə Nizami anlaşmanın dekabrdan iyuna kimi olan bölümündəki maaşından imtina edib, halallaşacaq? Hər halda, tərəflərin söhbətindən sonra məsələyə tam aydınlıq gələcək.
Bununla bağlı Zaur Axundovun özüylə danışmaq istəsək də, zənglərimiz cavabsız qaldı. İcraçı direktor Rəmiş Malıyev də dəstəyi qaldırmağa ərindi. Belədə üz tutduq klubun mətbuat katibi Səbuhi Məmmədova: “Dediyiniz kimi, Nizami Hacıyevin “Keşlə” ilə müqaviləsinin müddəti mövsümün sonuna qədərdi. “Neftçi” onu heyətində görmək istəyirsə, ilk növbədə bizə rəsmi müraciət etməlidi. Yalnız bundan sonra məsələyə baxıla, qərar verilə bilər. Lakin bu günə kimi kluba belə müraciət daxil olmayıb. Ortada konkret nəsə olmadan fikir bildirmək mümkün deyil”.
Səbuhi bəyin dediklərindən söhbətin məğzini anlamaq çətin deyil. “Keşlə” qarşı tərəfdən müraciət gözləyirsə, deməli, Nizamini eləb-belə buraxmaq niyyətləri yoxdu. Belə olmasaydı, klubla futbolçu arasında müqavilə qarşılıqlı razılıq əsasında pozulardı. Deməli, məqsəd “Neftçi”dən 5-10 manat qoparmaqdı. Öz aramızdı, kim öz kapitanını havayı buraxar?
HƏBİB