Bildiyiniz kimi, premyer-liqanın 12-ci turunda baş tutan “Qarabağ” – “Sumqayıt” matçında (2:0) meydan sahiblərinin azarkeşləri polis zorakılığına məruz qaldı. Qarşıdurma zamanı rezin dəyənəklər işə düşdü. Nəticədə bir neçə fanat xəsarət aldı, bəziləri bölməyə aparıldı. Xəsarət alan azarkeşin ayağı sınmışdı. Bu, “Qarabağ boys” azarkeş qrupunun üzvü Səbuhi Mikayılovdu.
Hər kəsə maraqlı idi, Səbuhi dünən “Qarabağ”la oyunu stadionda izləyibmi? Ümumiyyətlə, klub bunu ona təklif edibmi? İkinci məsələ isə Mikayılovun məsələni hüquq müstəvisi çərçivəsində həll edib-etməməsidi. O niyə ərizə ilə döyülməsinə görə şikayət etməyib?
Səbuhi “Çelsi” ilə oyuna getməməsinin səbəbini belə açıqladı: “Qarabağ boys” mənə təklif etdi. Amma oyuna gedəcək halda deyildim. Ağrıyıram. Ona görə də evdən izləməyi üstün tutdum. Azarkeş qrupumuz mənim üçün hər şey edir. Lazımi xərcləri qarşılayırlar. Dərmanlar üçün kömək edirlər. Məni vuran adamın sifəti yadımda deyil. Çünki orda ara qarışmışdı. Polislərin hamısı da eyni libasdadı. Ona görə ərizə yazmadım ki, mən ora “Qarabağ”a görə gedirəm. Bu kluba canımız da qurban. Ona görə də şikayət etmək istəmədim. Mənə dəstək olan hər kəsə təşəkkür edirəm. Heç kimin kiminsə qolunu-qıçını sındırmaq haqqı yoxdu. Fanata əl qaldıranın Allah bəlasını versin. Başqa nəsə deyə bilmərəm”.
ŞƏFİ ŞƏFİYEV