Sizin reklam burada

Aqil Nəbiyev İmişli stadionuna ziyan vurub

Baxış Sayı:740

Aqil Nəbiyev İmişli stadionuna ziyan vurub
Dünən AFFA-nın İntizam Komitəsinin növbəti iclası keçirilib. Budəfəki toplantı birinci divizionda 7-ci və 8-ci turlarda baş verən qayda pozuntularının müzakirəsinə həsr olunub. 7-ci turun “Zaqatala” – “Şüvəlan” qarşılaşmasında qonaq komandanın 5 üzvü sarı vərəqə alıb ki, bu da 80 manat cərimə deməkdi. “Binə”ni isə qapıçısı ziyana salıb. “Turan Tovuz”a uduzduqları oyunun uzatma dəqiqələrində “rəqibi aşkar qol vurmaq imkanından məhrum etdiyinə görə” meydandan kənarlaşdırılan Ramil Kərimov 1 oyun cəza və 20 manat cərimə ilə canını qurtarıb.
Son turda da cəmi iki oyunda AFFA nümayəndəsinin raportunda “xüsusi qeyd” olub ki, İK da buna əsasən cəzaları açıqlayıb. “Ağsu” – “Binə” matçı başlamazdan əvvəl qonaq komandanın azarkeşləri pirotexniki vasitələrdən istifadə edib. Bu səbəbdən “Binə” 80 manat cərimələnib. “Mil-Muğan” – “Şüvəlan” qarşılaşmasında isə böyükhesablı məğlubiyyəti həzm etməyən “Şüvəlan”ın baş məşqiçisi Aqil Nəbiyev hirsini stadionun plastik şitini sındırmaqla soyutmaq istəyib. Stadiona dəyən ziyanı “Mil-Muğan” klubunun təqdim edəcəyi hesab əsasında “Şüvəlan” ödəyəcək.
Beləliklə, son iclasda klublara 180 manat cərimə kəsilib. Nəticədə mövsümün əvvəlindən bu yana cərimə sanksiyaları üzrə nəzərdə tutulan məbləğ 34220 manata çatıb.

Oxşar xəbərlər
SON XƏBƏRLƏR