“Heç şübhə etmirəm ki, azərbaycanlı voleybolsevərlər məni yaxşı tanıyırlar. 20 ildən artıq Azərbaycanın voleybol yığmasının şərəfini qorumuşam. Azərbaycan klublarından isə “Azərreyl”də, “Lokomotiv”də və “Azəryol”da oynamışam. Karyeramın hər bir uğuru, hər bir qələbə mənim üçün dəyərlidi. Amma sözsüz ki, “Azərreyl”lə qazandığımız uğurları fərqləndirməliyəm. Çünki bu uğur təkcə bizim həyatımızda yox, ümumilikdə Azərbaycan voleybolunun tarixində yeni bir səhifə idi. Bununla da Azərbaycandan voleybolun inkişafına yeni bir təkan verildi. “Azərreyl”in heyətində 2001/02 mövsümündə “Top Komandalar Kuboku”nun qalibi olduq. Yeri gəlmişkən, həmin möhtəşəm hadisə də indiki kimi, mart ayına təsadüf edirdi. O günləri xatırlayanda indi də həyəcanlanıram. Çox gözlər hisslər keçirirdik, qələbə qazanmaq möhtəşəm idi. Final görüşümüz Serbiyanın “Yedinstvo” komandası ilə oldu. Bizim möhtəşəm heyətimiz, mübariz kollektivimiz var idi. Həlledici qarşılaşma zamanı bizə dedilər ki, bizi tribunadan İlham Əliyev və onun həyat yoldaşı Mehriban xanım izləyəcək. Ümummilli liderimiz Heydər Əliyev də komandayla yaxından maraqlanırdı, bizi dəstəkləyirdi. Oyunlarımıza Heydər Əliyev də baxırdı, azarkeşlik edirdi. Bütün bunlar bizə əlavə motivasiya verirdi. Heydər Əliyevlə görüşümüz oldu. Həmin görüşdə bir daha bildik ki, ümummilli lider komandamızı yaxşı tanıyır, oyunlarımıza baxıb. Heydər Əliyev biz idmançılara əsl dost münasibəti göstərirdi, onunla görüşümüz xeyli səmimi və isti keçdi. Tarixi görüş zamanı bizə xatirə hədiyyələri təqdim olundu. Hədiyyələr Heydər Əliyevin imzası olan qızıl saatlar idi. O əziz hədiyyəni indi də ən qiymətli əşya kimi saxlayıram. Deyərdim ki, bu, mənim üçün bütün zamanların ən qiymətli hədiyyəsidi. Oğlum da bu hədiyyəni çox əzizləyir, ikimiz üçün də yüksək qiymətə malikdi. Biz isə “Azərreyl” komandasının adından ulu öndərə top bağışladıq. Bu zaman Heydər Əliyev özünün də bir vaxtlar voleybolla məşğul olduğunu dedi. Belə bir möhtəşəm insanla tanış olmağıma, görüşməyimə çox sevinirəm. Xoşbəxtəm ki, belə imkan qazanmışam”.