"Kəpəz"lə oyundan sonra üçgünlük istirahətə buraxılan "Qarabağ” məşqləri bu gün bərpa edəcək. Milli komandaların oyunlarına görə çempionatda yaranan fasilə müddətinə aid hazırlıq planında qeyri-adi nəsə yoxdu. Başqa sözlə, yoxlama oyunu nəzərdə tutulmayıb. Qurban Qurbanovun sonradan planda dəyişiklik edəcəyi inandırıcı görünmür. Bu da komanda üzvlərinin onsuz da sıx təqvimlə çıxış etməsi ilə bağlıdı.
Fasilədən yararlanan kapitan Rəşad Sadıqov isə Türkiyəyə yollanıb. Ağdam klubunun U-19-nu çalışdıran Rəşad PRO kateqoriyası almağa çalışır. Qardaş ölkəyə səfər də PRO ilə bağlıdı. 35 yaşlı müdafiəçi “Beşiktaş”ın bazasında bir neçə gün təcrübə keçəcək.
"Qarabağ"la bağlı bir xəbəri də diqqətinizə çatdıraq. Qəzetimizin ötən sayında "Çelsi" ilə noyabrın 22-də keçiriləcək oyun üçün 30 mindən çox bilet satıldığını xəbər vermişdik. Dünən klubdan aldığımız informasiyaya görə, artıq 45 min bilet sahibini tapıb. Satış tempinə əsasən "Çelsi" ilə matçda anşlaq olacağını deyə bilərik.