Faiq Həsənov: “Rəqiblər baxırdı ki, Rauf oynayır, ya yox”
Dünən Gənclər və İdman Nazirliyinin inzibati binasında Avropa çempionu olan kişilərdən ibarət şahmat yığmamızın iştirakı ilə mətbuat konfransı keçirildi. Əvvəlcə nazir müavini İsmayıl İsmayılov Azərbaycanın şahmat ölkəsi olduğunu vurğulayıb, 3-cü çempionluğun böyük uğur olduğunu və bunun diqqət-qayğı nəticəsində reallaşdığını qeyd etdi. Daha sonra Şahmat Federasiyasının (AŞF) vitse-prezidenti Faiq Həsənov komandamızın çempionluğa gedən yolunu “xırdaladı”: “Olimpiadada komandamız pis çıxış etmişdi. Avropa çempionatı yığmaya özünəinam qazandırmalıydı. Reytinqdə 2-ci idik və ən azı gümüş medal qazanmaq istəyirdik. Ancaq heç vaxt millinin üzərində təzyiq qurmurduq. Start sürpriz oldu. Reytinqdə turnirin 22-ci komandası olan İtaliyaya uduzduq. Mən bunu yorğunluqla da əlaqələndirərdim. Çünki bir gün əvvəl 18 saata Bakıdan Kritə çatmışdıq. İspaniya ilə heç-heçədən sonra artıq xal itkisinin yolverilməz olduğunu söylədik. Bundan sonra qələbələri sıraladıq. Çox güclü rəqiblərə qalib gəlib çempion olduq. Rauf artıq 2700 əmsalı keçib. İndi başqa mərhələyə adlayıb. Ona görə də tez-tez Şəhriyarla birgə görürük (gülür). Rəqiblər baxırdı ki, Rauf oynayır, ya yox”.
Digər vitse-prezident Mahir Məmmədov bunları söylədi: “Optimal heyətlə AÇ-yə qatıldıq. Eltacı da kənarda qoymadıq. O həm kapitan, həm də məşqçi kimi özünü sübut etdi. Karyerasını bitirdikdən sonra rahat bu işi görə bilər. Klublararası Avropa Kuboku AÇ üçün yaxşı hazırlıq oldu. “Odlar yurdu” həm kişilərin, həm də qadınların yarışında medal qazandı. Şahmatçılarımızın hər biri haqda ayrıca danışmaq olar. Şəhriyar və Arkadi +2, Teymur +3, Rauf +7 nəticə göstərdi. Bundan sonrakı hədəf gələn il Batumidə keçiriləcək Olimpiadada medal qazanmaqdı. İddiaçıların Turnirinə həm Şəhriyar, həm də Teymur qatıla bilər. Fərq ondadı ki, Məmmədyarovun taleyi öz əlində deyil. Əsas rəqiblərinin “Qran-pri” seriyasının son yarışında uğursuz çıxış etməsi lazımdı. Rəcəbovun şansı isə öz əlindədi. İspaniyada yüksək yerlərdən birini tutsa, İddiaçıların Turnirinə vəsiqə qazanacaq. Ola bilər ki, hər iki şahmatçımız məhz “Qran-pri”dən bu yarışa bilet əldə etsin”.
Rauf Məmmədov: “Sözsüz, ilk çempionluğun sevinci daha böyük idi. O zaman heyətimizdə Vüqar Həşimov da vardı. Həmin çempionluğun hər anını xatırlayıram. Avropa Kubokunda Qrişuka qalib gəlməyə çox yaxın idim. Ancaq sona yaxın düzgün gedişləri tapa bilmədim. Əvəzində Şəhriyar ona AÇ-də qalib gəldi. Bu yarışa da məşqçim Aleksandr Xalifmanla hazırlaşmışdım. Artıq neçə ildi onunla işləyirəm”.
Şəhriyar Məmmədyarov: “Birinci qələbə hər zaman yaddaqalan olur. Ancaq bu çempionluq da şirindi. Reytinqə görə titula real iddiaçı idik. Eltaca “çox sağ ol” deyirəm. O həm yaxşı kapitan, həm yaxşı məşqçi, həm də yaxşı çay gətirən idi (gülür). Fikrimcə, Rusiyanın heyətində hətta Vladimir Kramnik, Sergey Karyakin və Pyotr Svidler də yer alsaydı, yenə çempionluq üçün oynayacaqdıq. Mövcud heyətlə də onlar reytinq favoriti idi. Adı çəkilən şahmatçıların yerinə oynayanlar daha böyük əzmlə çıxış edirdilər ki, özlərini sübut etsinlər”.
Eltac Səfərli: “Bu qələbə çox önəmliydi. Hamı yaxşı formadaydı. Avropa Kubokunda da bunu görmüşdük. Bəzi oyunlarda debütlərimiz çox uğurlu alındı. Şahmatda heç də hər zaman hazırlıq rəqiblə oyunda tam effektli olmur. Amma bir neçə qarşılaşmada bu hazırlıq yerinə düşdü. İlk turda sürpriz məğlubiyyətdən sonra toparlanıb, uğurlu nəticə qazandıq”.
SƏRXAN