Yunanıstanın Krit adasında yığmalararası şahmat üzrə Avropa çempionatı sona çatdı. Dünən sonuncu - 9-cu turun oyunları keçirildi. Turnir cədvəlinə başçılıq edən kişilərdən ibarət yığmamız Ukrayna ilə qarşılaşdı. Hamıdan əvvəl Teymur Rəcəbov (2741) masanı tərk etdi. O, Yuri Krivoruçkoyla (2692) xalı yarı böldü. Daha sonra Şəhriyar Məmmədyarov (2791) Pavel Elyanovla (2720), turnirin ən uğurlu şahmatçısı Rauf Məmmədov (2678) isə Yuri Kuzubovla (2690) bərabərə qaldı. Arkadi Naydiç (2702) Ruslan Ponomaryovu (2687) aşkar üstələyirdi. Ancaq son gedişlər sərrast olmadığından bu qarşılaşma da “sülh”lə yekunlaşdı. Beləliklə, millimiz Ukrayna ilə heç-heçə etdi – 2:2. Digər görüşdə Rusiya Almaniyaya 3:1 hesabıyla qalib gəldi. Beləliklə, millimiz 2009 və 2013-cü illərdə olduğu kimi, yenə Avropa çempionu oldu. 3-cü dəfə qitənin ən güclüsü olan komandamızın titul sayına görə yalnız Rusiyadan (4) geri qaldığını da nəzərinizə çatdıraq.
Yekun sıralama: 1. AZƏRBAYCAN – 14, 2. Rusiya – 14, 3. Ukrayna – 13, 4. Xorvatiya – 13, 5. Macarıstan – 12, 6. İsrail – 12, 7. Rumıniya – 12, 8. Almaniya – 11, 9. Hollandiya – 11, 10. Polşa – 11...
Qadınlarımız isə son turda Serbiyaya qalib gəldi – 2,5:1,5. Günay Məmmədzadə (2393) Yovana Rapportla (2327), Ülviyyə Fətəliyeva (2348) Teodora İnyakla (2244), Xanım Balacayeva (2319) isə Marina Qayçinlə (2135) “sülh bağladı”. Zeynəb Məmmədyarovanın (2298) Yovana Eriki (2257) üstələməsi qələbəmizi təmin etdi. Nəticədə komandamız reytinqə uyğun pilləni – 8-ci yeri tutdu ki, bu da son dörd AÇ-də ən yüksək göstəricimizdi. Rusiya qızıl, Gürcüstan gümüş və Ukrayna isə bürünc medal qazandı.
1. Rusiya – 17, 2. Gürcüstan – 14, 3. Ukrayna – 13, Polşa – 12, Rumıniya – 12, 6. İspaniya – 11, 7. İsrail – 11, 8. AZƏRBAYCAN – 11, 9. Ermənistan – 11, 10. İtaliya – 10...
Qeyd edək ki, Rauf 4-cü lövhədə qızıl medal qazandısa, Şəhriyar 1-ci, Teymur isə 2-ci lövhədə “gümüş”ə sevindi.