UEFA Gənclər Liqası
Atletiko (İspaniya) – Qarabağ 0:1 (0:1)
Atletiko: 1. Alexandro Linares, 2. Eduardo Viana, 3. İqor Roxo (18. Covanni Navarro, 46), 4. Aytor Punyal, 5. Xose Karlos (k), 6. Oskar Kastro (17. Xuan Aquero, 46), 7. Xoakin Munyos, 8. Endi, 9. Alberto Salido, 10. Oskar Klemente (15. Rodriqo Rikelme, 64), 11. Salomon.
Ehtiyat oyunçular: 13. Karlos Paredes, 12. Fernando Qatanyaqa, 14. Fransisko Montero, 16. Mikel Karro.
Baş məşqçi: Manuel Kano Martin.
Qarabağ: 40. Məmməd Hüseynov, 47. Əsgər Hüseynov, 31. Oliver Stoymenovski, 3. Turan Manafov, 18. Süleyman Əhmədov, 24. Yaroslav Deda (72. Taleh Rzayev, 87), 38. İbrahim Qədirzadə, 39. Zaur Fərzəliyev (k) (36. Əli Əliyev, 74), 49. İbrahim Əliyev (26. Rahid Ağazadə, 57), 60. Pilağa Mehdiyev, 70. Misir Rüstəmov.
Ehtiyat oyunçular: 63. Rəhim Rəhimli, 27. Ülvi İbrahimov, 43. Davud Mahmudov, 54. İbrahim Hüseynov.
Baş məşqçi: Rəşad Sadıqov.
Qol: Y.Deda, 45.
Vərəqələr: O.Kastro, 17, İ.Qədirzadə, 55, M.Rüstəmov, 70, Ə.Hüseynov, 74, O.Stoymenovski, 88 – sarı.
Hakimlər: STEFAN KLOSSNER, Remi Zqraqqen, Efe Kurnazca (hamısı İsveçrə), Valentin Qomes (İspaniya).
Hakim-inspektor: Manuel Dias Veqa (İspaniya).
UEFA nümayəndəsi: Neyl Morro (Şimali İrlandiya).
31 oktyabr. Mahadaonda. “Serro Del Espino” stadionu.
Birinci hissəyə 1, ikinci hissəyə 2 dəqiqə əlavə olunub.
İlk dövrəni xalsız başa vuran “Qarabağ”ın 19 yaşlıları UEFA Gənclər Liqasında xalla tanış olmaq üçün İspaniyaya yollanmışdı. Hərçənd “Azərsun Arena”da 5 top vuran “Atletiko”dan səfərdə xal almaq inandırıcı görünmürdü. İlk dəfə Borçe Xristovun rəhbərliyi altında oyuna çıxan “köhlən atlar” hamını təəccübləndirməyi bacardı. Hərçənd buna görə bəxtə minnətdar olmaq lazımdı. Çünki 90 dəqiqə boyunca qonaqlar qapıya cəmi 2 zərbə endirdi. Bunlardan biri “çərçivə”yə çatmamış müdafiəçi tərəfindən dəf olundusa, digəri qolla nəticələndi. Ancaq meydan sahiblərinin 22 zərbəsindən heç biri tora qovuşmadı. Bir sözlə, İspaniyada idman xoşbəxtliyi təmsilçimizin tərəfində oldu.
İspanlar start fiti verilən kimi irəli atıldı. Autsayderlə görüşdə xal itkisini yolverilməz sayan “Atletiko” ilk 10 dəqiqədə 3 əlverişli vəziyyəti qaçırdı. İki dəfə Salomon qeyri-dəqiq oynadısa, 7-ci dəqiqədə Klementenin qola sevinməsinə qapıçımız imkan vermədi. 8 dəqiqə sonra Hüseynov növbəti dəfə Klementeni məyus etdi. “Qarabağ”ın ilk yaddaqalan həmləsi 17-ci dəqiqəyə təsadüf etdi. Onda da yuxarıda qeyd etdiyimiz kimi, Dedanın vuruşunu qapıçıdan öncə Kastro zərərsizləşdirdi. 20-ci dəqiqədə Məmməd yenə xilaskar rolunu oynadı. O bu dəfə Munyosun zərbəsini ustalıqla dəf etdi. Hissənin ortalarında ispanların təzyiqi nisbətən səngidi. Ancaq sona yaxın “Atletiko”nun futbolçuları yenə “Qarabağ”ın müdafiəsinə çətin anlar yaşatdı. Yaxşı ki, həmin gün Hüseynov keçilməz idi. Məmməd 38-ci dəqiqədə Endinin də arzusunu gözündə qoydu. “Vurmayana vurarlar” prinsipi işə düşdü. İspanlar gözləmədikləri halda qapılarında qol gördülər. Bir futbolçunun əhatəsindən çıxan Qədirzadə topu sağ cinahdakı Mehdiyevə ötürdü. Pilağanın cərimə meydançasına havalandırdı “dəri kürə”ni isə rəqib müdafiəçini qabaqlayan Deda başla tora qovuşdurdu. Bununla da ukraynalı futbolçu ardıcıl 2-ci oyunda “Atletiko”nun qapısına yol tapdı. İspanlar paltardəyişmə otağına “soyuq duş”la yollandı.
Manuel Kano Martin hücumu gücləndirmək üçün Aquerro və Navarronu döyüşə atdı. İkinci yarının startından 3 dəqiqə sonra Salido Hüseynov “səddinə ilişdi”. Bir qədər sonra Munyos Məmmədin öhdəsindən gələ bilmədi. Son yarım saatda “Qarabağ” tam qapanmış, rəqibə mümkün qədər boş mövqe verməməyə çalışırdı. Bununla belə, ustalıq səviyyəsi və taktiki savad sözünü deyirdi. “Atletiko” final fitinə qədər dəfələrlə fərqlənməyə yaxın oldu. Bir neçə epizodda top “çərçivə”dən yan keçdisə, daha bir neçə dəfə qolkiper komandasının dadına çatdı. Beləliklə, sürpriz baş verdi və “Qarabağ” debüt etdiyi yarışda ilk xallarını qazandı. Bu həm də “köhlən atlar”a qrupdan çıxmaq şansını saxlamağa imkan verdi.
Qrupun digər oyununda “Çelsi” səfərdə “Roma”ya 2:1 hesabıyla qalib gələrək vahid lider oldu. 5-ci turun görüşləri noyabrın 22-də keçiriləcək. “Atletiko” İspaniyada “Roma”nı sınağa çəkəcəksə, “Qarabağ” Bakıda “Çelsi”dən ilk qarşılaşmadakı darmadağının (0:5) qisasını almağa çalışacaq.
1. Çelsi 4 3 0 1 10-4 9
2. Atletiko 4 2 0 2 8-6 6
3. Roma 4 2 0 2 7-4 6
4. Qarabağ 4 1 0 3 2-13 3
SƏRXAN
