Bu mundialın yaddaqalan komandalarından biri olan və finalın biraddımlığında mübarizəni dayandıran Xorvatiya yığması ilə bağlı qalmaqallı xəbər var.

Football-plus.az xəbər verir ki, sosial şəbəkələrdə ölkənin bütün komanda şəklində Braziliya üzərində qazanılan tarixi qələbəni qeyd edərkən çəkilən bir video yayılıb. Həmin videoda açıq-aşkar görünür ki, xorvat futbolçular faşist yönlü “Tompson” qrupu tərəfindən ifa olunan bir mahnını səsləndirirlər.

Həmin mahnıda Yuqoslaviyanın dağılması və Bosniyadakı müharibə zamanı yaranmış, 1991-94-cü illərdə fəaliyyət göstərmiş Herseq-Bosna Xorvatiya Respublikasına dair sözlər yer alır. Videonu ən birinci “tvitter”də Bosniya və Hersoqovina yönlü “BiHFootball” səhifəsi paylaşaraq bu mahnının bosniyalılar üçün zülm, işgəncə, təcavüz və köləlik mənasını verdiyini yazıb. Daha sonra isə videonu “Aclıq və Nifrət. Balkanlarda Demokratiya böhranı” adlı kitabın mülləifi, siyasətçi və publisist Yasmin Yuranoviç paylaşıb.

O, videoda başverənləri çox çirkin bir səhnə adlandıraraq bunu çağdaş xorvat toplumunun etnik cəhətdən çürüməsinə bir sübut kimi göstərib.

Qeyd edək ki, Xorvatiyada çox populyar olan “Tompson” rok-qrupu 1990-cı ilin əvvəllərində Yuqoslaviya parçalanarkən Xorvatiyanın müstəqilliyi üçün serblərə qarşı döyüşən və faşist yönlü fikirləri ilə tanınan sabiq zabit Marko Perkoviç tərəfindən yaradılıb. Perkoviç “Tompson” adını isə həmin vətəndaş müharibəsi zamanı istifadə etdiyi eyniadlı tapança-pulemyotdan götürüb. Adətən, hərbi formada səhnəyə çıxan Perkoviç eyni zamanda İkinci Dünya Müharibəsində bir çox qətliamlar törədən xorvat faşistlərindən hesab olunan Ustaşların da mahnılarını ifa edir. Bu baxışları üzündən onun dəfələrlə yəhudilərin çox yaşadığı şəhərlərdə konsertləri ya təxirə salınıb, ya da böyük qalmaqala səbəb olub. Perkoviçin mahnıları Xorvatiyada futbol fanatları arasında çox populyardı. Yuqoslaviyanın dağılması ilə nəticələnən müharibədə, sözsüz, ən çox ziyan çəkən bosniyalılar olmuşdu. Bosniyanın xüsusilə məsülman təbəqəsi həm xorvat, həm də serblərin zülmünə məruz qalmış, nəticədə 100 mindən çox insan öldürülmüş, 2 milyondan çox insan vətənindən qaçmaq məcburiyyətində qalmışdı.

Əslində bu, Xorvatiya ilə bağlı ilk siyasi qalmaqal deyil. Bu komanda əvvəlki illərdə dəfələrlə belə qalmaqalların mərkəzində olub. Xorvatiyalı futbolçular hələ AÇ-2008-in seçmə mərhələsində səfərdə İngiltərə üzərində qazanılan qələbədən sonra birbaşa “Uembli”də “Tompson”un mahsını ifa etmişdilər. Eyni hadisə ötən mundialda qrup mərhələsində Argentina üzərində qələbədən sonra da yaşanmışdı. Deyan Lovren ilə Şime Vrsalko paltardəyişmə otağında “Tompson”un “Bojna Cavoglave” mahnısını oxumuşdular. Xorvatların faşist bir qrupun bosniyalıların belə desək, yarasına duz səpən bir mahnısını səsləndirmələri həqiqətən də rüsvayçılıqdı. Çünki xorvatların kapitanı Luka Modriç özü də müharibənin nə demək olduğunu gözəl bilir və onun acısını çox çəkib. Atası serblər tərəfindən öldürüldüyü üçün “Qızıl top”un qalibinin həyatının bir hissəsi Zadarda yerləşən qaçqın şəhərciyində keçib. O, futbola da məhz burda başlayıb. Ona görə də Modriçin kapitanı olduğu bir komandanın faşist yönlü mahnılar səsləndirməsi əsl fiaskodu.