Yaponiya çempionatında oynayan Fineo Alesiodan dəvət gözləyir
Futzal üzrə ölkə çempionatında 2-ci turun oyun cədvəli açıqlanıb. Turun oyunları oktyabrın 7-də baş tutacaq. İlk turdan fərqli, bu dəfə oyunlar Bakı İdman Sarayında keçiriləcək. Əslində turun təqvimi bazar ertəsindən məlum idi. Ancaq oyunların vaxtında dəyişiklik edilib. Daha doğrusu, turun açılış matçının saatı dəyişdirilib. Bu da yayınla bağlıdı. “Yasamal” – “Araz” oyunu saat 15.00-a salınmışdı. Ancaq Futzal Federasiyası ilə “CBC Sport” arasında görüş olub və çempionat oyunlarının göstərilməsi ilə bağlı razılıq əldə olunub. Hələ ilk turdan sonra "CBC Sport" görüşlərin icmalını təqdim etmiş, həftəsonu idman xəbərlərində nəticələr haqda məlumat çatdırmışdı. 2-ci tur isə ayın 7-nə təsadüf edəcək ki, şənbə günü telekanalda "boş gün"dü. Odu ki, "CBC Sport"un həftəsonu canlı yayın təşkil edəcəyi gözlənilən idi. Baxmayaraq ki, telekanalın baş redaktoru bu barədə bazar ertəsi ona ünvanladığımız sorğunu "hələ dəqiq deyil" deyə cavablamışdı. Nəhayət, dünən məsələ razılaşdırılıb. O şərtlə ki, “Yasamal” – “Araz” qarşılaşması 14.30-da başlasın. Beləliklə, turun açılış oyunu yarım saat tez başlayacaq. Əslində yayın 15-20 dəqiqə tez başlayacaq. Rüstəm Əfsərlinin aparıcısı olacağı verilişə qonaq qismində Futzal Federasiyasının mətbuat katibi Mahal Məmmədov dəvət olunub.
Günün ikinci oyunu saat 16.30-da FK.İD ilə “Ekol” arasında baş tutacaq. Nəhayət, turun son qarşılaşması saat 18.00-da başlayacaq ki, debütant “Marafon” ilk turda məcburi istirahət edən “Xəmsə” ilə gücünü sınayacaq.
Bu arada yayda “Araz”dan ayrılan Fineo Avropa çempionatının püşkünün nəticələri ilə bağlı açıqlama verib. Hazırda karyerasını Yaponiyanın güclülər dəstəsində (F Liqasında) mübarizə aparan “Agleymina Hamamatsu” klubunda davam etdirən millimizin üzvü Futzal Federasiyasının “feysbuk” səhifəsinə verdiyi açıqlamada onları çətin sınaq gözlədiyini deyib: “Həqiqətən çox çətin qrupda yer almışıq. İspaniya 7 dəfə Avropanın ən güclüsü olub. Son illərdə onları ancaq İtaliya kürsüdən salıb. Fransa isə bura qədər irəliləyə bilibsə, deməli, ciddiyə alınası rəqibdi. Final mərhələsində iştirak etməyim üçün ilk növbədə baş məşqçi məni komandaya dəvət etməlidi. Çempionatda müntəzəm oyunlar keçiririk, yaxşı formadayam. Amma qərarı Alesio verəcək. Üzərimə düşən məsuliyyəti dərk edir, hansı işləri görəcəyimi bilirəm. Nəzərə alın ki, Sloveniyada həlledici mərhələnin oyunları keçiriləcək. Birinci mərhələ deyil ki, rəqiblər nisbətən zəif olsun. Ona görə də düzgün seçim etmək vacibdi”.
"Ekol"un gənc oyunçusu Fərid Ələkbərov isə müsahibə verib. Futzalçı "Araz"la rəqabətdən və çempionatın səviyyəsindən danışıb.
- Yeni mövsümün startı və ilk oyununuz barədə təəssüratın necədi?
- İlk oyunda “Araz”la qarşılaşdıq. Bu komandaya qarşı oynamaq çox çətindi. Mümkün qədər çox mübarizə aparmalısan. Çünki topla oynamaq şansımız, imkanımız az olur. Məşqçimiz çempionata hazırlıq prosesini yaxşı keçdiyinə görə sona qədər mübarizə apardıq, dözdük, rəqibi son saniyəyə qədər gərginlikdə saxladıq. Etiraf edim ki, hələ “Araz”ı udacaq gücdə deyilik.
- Startda bu cür güclü rəqiblə qarşılaşmaq sonrakı oyunlara necə təsir edəcək?
- “Araz”la qarşılaşmaq bizim üçün yaxşı oldu. Çünki hazırlıq dövründə az yoldaşlıq oyunu keçirmişdik. Həm də çempionatda əsas rəqqibimiz bu komanda deyil. “Araz”la oyun bizim üçün bir növ təcrübə oldu. Hansı çatışmazlıqların olduğunu gördük. Növbəti qarşılaşmalara daha yaxşı və fərqli hazırlaşacağıq.
- Belə çıxır ki, yeni mövsümdə də “Araz”ın çempion olacağı fikri ilə barışmısız?
- Barışmamışıq, sadəcə, bu komanda millinin bazasıdı. Üstəlik, heyətində legionerlərin sayı çoxdu. Onlarla rəqabət aparmaq üçün daha çox işləməliyik. Bu gün üçün bu mümkün deyil.
- Birinci tur çərçivəsində keçirilən digər oyunları da izlədiz. Komandaların səviyyəsi maraqlı mövsüm izləməyə ümid verirmi?
- Futzal oynadığım vaxtdan bəri bəlkə də ən maraqlı çempionat keçiriləcək. Komandaların bir-birindən xal almaq şansı çoxdu. Hətta “Araz”la oyunda biz bunu etməyə yaxın olduq.
- Deməli, “Araz” istisna olmaqla digər komandaların gücü bir-birinə yaxındı?
- Demək olar, eyni səviyyəli komandalardı. İndi heç kim düşünməsin ki, debütant komanda "Ekol"u uda bilməz. Necə biz “Araz”la başabaş mübarizə apardıq, onlar da bizimlə oyunları o cür keçirəcəklər.
- Bu rəqabət nə vəd edir?
- Əlbəttə, ən rəqabətli çeempionat izləyəcəksiz. Sözsüz, bu rəqabətdən qazanan futzalımız olacaq. İnkişaf mütləq hiss olunacaq.
MİRAĞA hazırladı