“Türkiyə futbolu Avropa səviyyəsindədi”
Toplanış üçün Antalyaya gələn klublardan biri də “Napoli”di.
Football-plus.az xəbər verir ki, A seriyasında inamla turnir cədvəlinə başçılıq edən və ən yaxın rəqibindən 8 xal öndə olan, eləcə də ÇL-də qrupdan lider kimi çıxan neapollular hələ ki mükəmməl mövsüm keçirir. Komandanın təcrübəli baş məşqçisi Luçano Spalletti türkiyəli həmkarlarımıza açıqlamalar verib. Türkiyədə çalışan italiyalı məşqçilərdən və komandasına Türkiyədən gəlmiş oyunçulardan bəhs edən 63 yaşlı mütəxəssis Fatih Terimə də tərif yağdırıb:
“Hazırda Montella, Pirlo və Farioli Türkiyə çempionatında işləyir. Fariolini yaxından tanıyıram. Dost münasibətlərdəyik. Böyük potensiala malik olduğunu bilirəm. Montella isə “Adana Dəmirspor”un başında önəmli işlər görür. Komandası 3-cü pillədədi. Montella mənim sabiq yetirməmdi. Məşqçi kimi dəfələrə üz-üzə gəlmişik və məni bir neçə dəfə məğlub edib. Bir gün mən də Türkiyədə işləmək istərdim. Bəziləri Türkiyəyə 2-3-cü səviyyəli futbol ölkəsi kimi baxsa da, bu, yanlış fikirdi. Türkiyə futbolu Avropa səviyyəsindədi. Önəmli məşqçilərin bura çalışmağa gəlməsi təsadüf deyil. Onlar burdakı potensialı görürlər. Əslində istedadlı futbolçular hər yerdə var. Sadəcə, o istedadı inkişaf etdirib ortaya çıxarmaq lazımdı. Türkiyə bu cəhətdən seçilir. “İmperator” Fatih Terim vaxtilə İtaliyada işləmişdi. “İmperator” ləqəbi onun komandalarına necə güc verdiyini, futbolçular üzərində necə hakimiyyət qurduğunu göstərir. Ona böyük hörmətim var. Münasibətlərimiz çox yaxşıdı. Bəzən elə olur ki, illərcə görüşmürük. Amma bu heç nəyi dəyişmir. İllərdən sonra bir-birimizi görəndə sanki ailə üzvü kimi görüşürük. Qucaqlaşıb uzun-uzadı söhbət edir, hekayələrimizi danışırıq. Florensiyanın kənarında yaşayıram. Ordakı insanların Terimi necə sevdiyini, onun haqda nə düşündüyün öz gözlərimlə görmüşəm. Nə qədər böyük bir şəxs olduğunu dərhal anlamaq mümkündü. Kulibali müdafiəmizin dirəyi sayılırdı və onun gedişindən sonra güclü bir müdafiəçi almalıydıq. Kim Min Çjenin necə potensiala malik olduğunu anlamaq üçün onu bircə dəfə izləməyim kifayət etdi. Ümidlərimi boşa çıxarmadı. Bizdəki oyunu ilə necə səviyyəyə malik olduğunu və necə böyük bir çempion olduğunu göstərir. Onu itirəcəyimizdən qorxmuruq. Neapol futbolla yaşayan şəhərdi. Ona görə də bu kluba gələnələr orda bir neçə il qalmağa üstünlük verir. Bizim klub olaraq da əlimizdəki oyunçuları saxlamaq üçün hər cür imkanımız var. Elif Elmas oynasa da, oynamasa da, gözümün nurudu. Bir neçə mövqedə oynamağa qadir olan və güclü xarakteri ilə seçilən futbolçudu. Daim üzərində çalışmaq və inkişaf etmək istəyir. Nə olur-olsun, mənim üçün həmişə dəyərli futbolçu kimi qalacaq. Komandamı təbrik edirəm. Mövsümü çox yaxşı keçiririk. Amma bu 1 aylıq fasilədə diqqətli olmalıyıq. Fasilədən sonra da əvvəlki formamızda qala bilsək, bu, bizim üçün əlavə üstünlük olacaq. Ən azı xal itkilərini minimuma endirməliyik. Çünki onsuz da bütün oyunlarda qalib gəlmək mümkün deyil. Hardasa mütləq xal itirəcəksən. İdeal komanda deyilik. Hələ də inkişaf etməyə ehtiyacı olan yönlərimiz var. Düzdü, səviyyəmizin maksimumunu ortaya qoyanda bu çatışmazlıqlar gözə görünmür. Antalyanı əvvəlki illərdən də gözəl tanıyıram. “Zenit”i çalışdırdığım dönəmdə bura iki dəfə gəlmişdik. Klubların əla hazırlıq keçməsi üçün gözəl şərait var. Buranın havası da əladı. Amma istəməzdim ki, Antalyaya öyrəşək. Çünki Neapola qayıtdıqda bizi yenə sərt qış havası gözləyəcək. Qaldığımız otelin səviyyəsinə söz ola bilməz. Yaxın gələcəkdə “Napoli” ilə bura yenidən gəlmək istərdim”.
