Sizin reklam burada

Qurban Qurbanova sual verilməməsi təsadüf olub

Baxış Sayı:2 048

Qurban Qurbanova sual verilməməsi təsadüf olub
Jurnalistlər hər şeyin spontan alındığını və baş məşqçinin tələsdiyini düşünür
Çərşənbə günü Azərbaycan tarixi gecəyə şahidlik etdi. Bəli, ölkəmizdə ilk dəfə Çempionlar Liqasının qrup oyunu keçirildi. Təbii ki, son illərin dəyişməz çempionu, ölkə futboluna adını qızıl hərflərlə yazdırmış “Qarabağ”ın iştirakı ilə. Ağdamlılar Bakı Olimpiya Stadionunda (BOS) “Roma”ya uduzdu. Əslində bu uduzulmalı görüş deyildi. “Qarabağ” ilk 15-20 dəqiqəni çıxmaq şərti ilə matçın qalan hissəsində çox yaxşı təsir bağışladı. Yəni bu görüşdən heç-heçə ilə ayrılmaq olardı.
Görüşdən sonra təşkil olunan mətbuat konfransında maraqlı olay yaşandı. Belə ki, “Qarabağ”ın çalışdırıcısı Qurban Qurbanova heç bir sual ünvanlanmadı. Mütəxəssisin oyun haqda fikirlərindən dərhal sonra klubun mətbuat xidmətinin rəhbəri Nurlan İbrahimov “kimin sualı var?” deyə müraciət etsə də, jurnalistlərdən səs çıxmadı. Nə bizimkilərdən, nə də qonaqlardan. Konfransda bəndəniz də iştirak edirdi. Lakin mən də sual verməyə tərəddüd etdim. Ona görə ki, hər şey bir an içində baş verdi. Qurbanova start heyətində Yakub Jezniçakın yox, Rəşad Sadıqovun görünməsi, Mahir Mədətovu niyə gec əvəzlənməsi ilə bağlı suallar verəcəkdim. Lakin qeyd etdiyim kimi, “ilk zərbə” məsuliyyətini öz üzərimə götürmədim. Həm də salonda məndən daha təcrübəli həmkarlarım var idi. Adətən, baş məşqçilərə sual verməyi çox sevirəm. O cümlədən Qurbanova. Nadir hallarda olur ki, mətbuat konfranslarında çalışdırıcıya sual verməyim. Amma srağagün alınmadı. Qətiyyən bunu hansısa boykot əlaməti kimi qəbul etmək lazım deyil. Düzdü, Qurban bəy salonu tərk edərkən əsəbi formada başını yellədi. Əslində heç buna da ehtiyac yox idi. Bəndənizlə bağlı məsələ, düşünürəm ki, aydındı. Bəs həmkarlarım niyə sual verməyib? Bəlkə həqiqətən də boykot xarakterli aksiya planlaşdırılıbmış və mən də onun aurasına düşdüm? Düşünmürəm. İdman mediasının “Qarabağ”a, xüsusilə də Qurbanova münasibətdə belə addım atacağına inanmıram. Buna baxmayaraq, “güvən, amma yoxla” prinsipinə sadiq qalaraq, bəzi təcrübəli həmkarlarımın fikirlərini öyrənməyi lazım bildim.
Elçin Cəlilov (futbolpress.az saytının baş redaktoru): “Düşünürəm ki, bu məsələ spontan alındı. Bu gün Qurbanovun mətbuat konfransını boykot etmək absurd olar. Belə söhbət mümkün deyil. Amma bir məqamı da xüsusi qeyd etmək istəyirəm. Klub tərəfi bir az tələsdi. Yəni Qurbanov oyun haqda açıqlama verəndən sonra dedilər ki, suallarınızı verin. Aradan 4-5 saniyə keçəndən sonra klub tərəfi qərar verdi və sağollaşdılar. Məncə, bir neçə saniyə də gözləmək lazım idi. Çünki baş məşqçi danışıb qurtaran anda jurnalistlər hələ kompüterdə yazı yazırdı. Bəlkə də heç kim yazını bitirməmiş konsentrasiya ola bilmədi. Təkrar edirəm, öz adımdan deyə bilərəm ki, boykotdan söhbət belə gedə bilməz. Həm də oyun elə məcrada davam etdi ki, heç bir sualım yox idi. Yeni mövsümdə “Qarabağ”ın həm ölkə çempionatında, həm də avrokuboklardakı matçlarından sonra keçirilən konfranslarda iştirak etmişəm. Adətən, son zamanlar çox sual vermirəm. Sadəcə, konfransı izləməklə kifayətlənirəm. Səbəb də odu ki, “Qarabağ” Azərbaycan standartından 5, bəlkə də 10 qat yüksək nəticələrə nail olub. Bu vəziyyətdə nə sual vermək olar? Müşahidə apara-apara qeydlərimi götürürəm. Hansısa sual versəm, gərək təşəkkürlə başlayım. “Qarabağ”a ancaq təşəkkür düşür. Dünənki (srağagünkü) hadisə ilə bağlı heç bir şübhəyə ehtiyac yoxdu. Qurbanov salonu tərk edəndə başını bulayıb, narazı qalıb? Heç bunu da iddia etmək doğru olmaz. Hansısa əlavə detal axtarmaq lazım deyil. Bir vətəndaş və jurnalist kimi “Qarabağ”dan yalnız bir narazılığım var: jurnalistləri tez-tez səfərlərə aparsınlar. İstər idman mediasını, istərsə də qeyri-idman. Bu çox vacib məsələdi. Bu halda klub düşünməməlidi ki, kimisə çağırsa, kimsə inciyəcək. Burda incimək üçün heç bir əsas yoxdu. Belə adla aparmaq mümkün deyilsə, hansısa müsabiqə keçirsinlər və qalibləri aparsınlar. Səfərə yollanan şəxslər də fəal olmalıdı. Rəqib çalışdırıcıya, klub nümayəndələrinə suallar verməli, müsahibələr almalıdılar. Üstəlik, Qarabağ, ümumiyyətlə, klub haqda suallar versinlər. Məsələn, Londonda azərbaycanlı jurnalist olsaydı, Antonio Konteyə verilən suallardan biri də mütləq Qarabağ haqda olacaqdı. Bu da dünyanın bütün media orqanlarında dərc olunacaqdı. Bunun özü belə böyük bir piardı. Qalan hər şey əladı. Başqa klublarımıza da “Qarabağ”a baxıb, səbirlə, diqqətlə və məqsədlə çalışmağı məsləhət görürəm. Dəqiq qurulmuş iş öz bəhrəsini verir. “Qarabağ” və “Qəbələ”də müəyyən sistem var. Artıq “Zirə” də onlara yaxınlaşmaqdadı. “Neftçi” də ayılmaq üzrədi. Başqaları da onlara qoşulmalıdı. Gəlin, mətbuat konfransı ilə bağlı pis düşünməyək, qaşınmayan yerdən qan çıxarmayaq”.
Araz Əhmədov (sport.fm radiosunun baş redaktoru): “Əslində Qurbanova ünvanlacaq çox sualım var idi. İbrahim Şehiçin start heyətində yer almasından tutmuş, Yakub Jezniçakın ehtiyatda qalmasına qədər. Ancaq bu dəfə sual verməyi lazım bilmədim. Bunun çox səbəbləri var. Sadəcə, onu diqqətə çatdırmaq istəyirəm ki, İtaliyadan bu qarşılaşmanı işıqlandırmaq üçün 40-a yaxın idman jurnalisti ölkəmizə təşrif buyurmuşdu. Təəssüf ki, hazırda bizim KİV klublarımızın avrokuboklardakı səfər matçlarına yollana bilmir. Bunun nədən qaynaqlandığını hamımız yaxşı bilirik”.
Elmar Abdullazadə (futbol11.az saytının redaktoru): “Öz adıma deyə bilərəm ki, heç bir etiraz yox idi. Fikrimcə, əvvəldən belə bir şey olsaydı, xəbərim olardı. Digər tərəfdən, niyə etiraz etməliydik? Komanda məğlub olsa belə, tarixində ilk dəfə ÇL-in qrupunda oynamaq sevincini yaşadıb. Etiraz olsaydı, elə bir gün əvvəl oyunöncəsi mətbuat konfransında bunu hiss etmək olardı. Sadəcə, sanki hər şey biranlıq oldu. Düzü, həmin vaxt mən Qurban bəyin dediklərini yazırdım deyə, bir az başım qarışıq idi. Başımı qaldıranda isə artıq gec idi".
Rüstəm Piriyev (extratime.az saytının redaktoru): “Açığı, orda boykot xarakterli nəsə baş vermədi. Yəni planlaşdırılmış bir aksiya deyildi. Bunu yalnız öz adımdan deyə bilərəm. Qalan həmkarların yerinə nəsə söyləmək doğru olmaz. Mənim Qurbanova bir neçə sualım var idi. Sadəcə, başa düşürdüm ki, çalışdırıcı suallarıma cavab verməyəcək. Suallarımdan biri o idi ki, Qurbanov nəyə görə bu qədər inadkarlıq göstərərək İbrahim Şehiçlə Rəşad Sadıqovu meydana buraxır. İnamlı oynadı-oynamadı, fərqi yoxdu. Hər dəfə bu iki futbolçunu meydana buraxır. Özü də inadla. Hər dəfə də bunun əziyyətini çəkir. Anladım ki, bu sualı versəm, heç bir cavab alınmayacaq. Qurbanovun cavabı nəinki adekvat olmayacaqdı, o deyəcəkdi ki, biz ən yaxşı formada olanları meydana buraxırıq. Şablon sözlərdən istifadə edəcəkdi. Bu üzdən sual verməyə ehtiyac duymadım. Kollektivə gəlincə, bu təsadüfən alındı. Bəlkə də kiminsə sualı var idi və həqiqətən də baş məşqçiyə onu ünvanlamaq istəyirdi. Hərdən mətbuat konfranslarında elə olur ki, bir nəfər digərindən sualın verilməsini gözləyir. Bəzi hallarda jurnalistlər düşünür ki, sualı həmin anda yersiz görünər, sonra soruşsam, daha yaxşıdı. KİV nümayəndələri iki hissəyə bölünmüşdü. Bir çoxu “miks-zona”ya getmişdi, yarısı da mətbuat konfransında idi. Bunu spontan hadisə kimi dəyərləndirirəm”.
ŞƏFİ ŞƏFİYEV

Oxşar xəbərlər
SON XƏBƏRLƏR