Zaur Əzizov: “Dediyiniz qədər qlobal problem deyil”
Son iki ildə ölkədə baş qaldıran maliyyə böhranı bir çox sahələrdə olduğu kimi, futboldan da yan keçmədi. Bir neçə klub tarixin yaddaşına qovuşdu, bəzilərinin büdcəsi azaldıldı, bir neçəsi isə hələ də əziyyət çəkməkdədi. Siyahıda adı başda gedənlərdən birinci “İnter”di. Onsuz da qəpik-quruşa oynayan futbolçular xeyli vaxtdı pul üzünə həsrətdi. Düzdü, əməkhaqqının müəyyən hissəsi ödənilsə də, bu məsələnin tam həlli demək deyil.
Əldə etdiyimiz bilgiyə görə, bu baxımdan “İnter” tək deyil. Büdcəsinə görə “Qarabağ”dan başqa digər rəqiblərini qabaqlayan “Qəbələ”də də maaş problemi yaşanır. Mənbənin dediyinə inansaq, klubda çalışanlar, məşqçilər heyəti və futbolçular iyul və avqust ayının məvacibini almayıb. Bundan başqa, söz verilən mükafatlar da gecikir. Xəbəri eşidən kimi klubun baş meneceri Zaur Əzizovla əlaqə saxlayıb, məlumatı dəqiqləşdirməyə çalışdıq: “Hər yerdə olduğu kimi, bizdə də bəzən gecikmələr olur. Lakin bu dediyiniz qədər qlobal problem deyil. Hələ ki narazılıq bildirən olmayıb. Bir neçə gün gözləməklə heç nə olmaz”.
HƏBİB
