Avropa Liqasında qrup mərhələsinin son matçları keçirilir.

"Qarabağ" "Frayburq"la bərabərə qalıb - 1:1. Oyundan sonra ağdamlıların baş məşqçisi Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Bu gün xeyli əsəbi göründüz. Hakimliklə bağlı nə deyə bilərsiz? Onların nəticəyə nə qədər təsiri oldu?
- Çox qaranlıq bir epizod idi. Həmin anda ofsayd bəlkə də var idi. Penalti epizodunda isə ayağına vurmuşdu. Ofsaydı göstərmirlər, xət çəkilmir. Penalti epizoduna da baxılmadı. Bilmirəm, hakimlər barədə danışmağın faydası var ya yox. İndi VAR sistemi daha ön plandadı. Nə istəyirlər, edirlər. Bəlkə, özlərinə sərf etdikləri kimi qərarlar qəbul olunur. Bütün oyunlarda xətt qoyulursa, burada da göstərilməlidi. Hamıya eyni gözlə baxılmalıdı. Nəticəyə nə qədər təsir etdiyini deyə bilmərəm. Qol sayılsaydı, komanda daha istəkli olardı. Bəlkə, qırmızı vərəqə də almazdıq. Bu hallar da futbolun sevilən tərəflərindəndi. 10 nəfərlə qol vurmaq, mübarizə və s. Çox danışmaq olar. Nə qədər təsir etdiyini bilmirəm. Görünən odu ki, etdi. Daha yaxşı nəticə ola biıərdi.

- İctimaiyyət arasında belə fikirlər var ki, Konfrans Liqası perspektiv baxımından Avropa Liqasından daha yaxşıdı...
- Biz istəmişik ki, şansımızdan istifadə edək. Çempionlar Liqasının qrupunu istəyirdik. Avropa Liqasında davam etməyi düşünürdük. Bunun üçün mübarizə apardıq, il boyu çalışdıq. İstənilən rəqibə qarşı yaxşı oyun göstərmək istəyirdik. Əminəm ki, bunu bacardıq. Nəticə belə oldu. Düzgün, vicdanla işləmək borcumuzdu. Bunu edirik. Nəticə bu oldusa, razılaşmalıyıq. Gələn il də avrokubok həyəcanı yaşayacağıq. İstəyimiz 2-ci yeri tutmaq, Avropa Liqasında davam etmək idi. Alınmadı. Bunun üçün meydanda maksimum gücümüzü qoyduq. Çox da təəssüflənmirəm. Heç bir rəqibə əzilmədik, aciz qalmadıq. Əksinə onların üzərinə getməyə çalışdıq. Elə oyunlar oldu ki, böyük risklər etdik. Böyükhesablı məğlubiyyətləri də gözlə alırdıq. Hər şey heç də pis getmədi. Futbolçularımız çəkinmədi. İnanıram ki, bunun əvəzi nə vaxtsa veriləcək. Qarşıda görəcəyik.

- Komanda oyuna çox yaxşı başlamışdı. Ancaq ilk hissənin ortalarına yaxın rəqib oyunu bərabərləşdirdi və penaltidən qol vurdu. Bu, nə ilə əlaqədar idi?
- Üstünlüyü çox da rəqibə vermədik. Qarşımızdakı komandanı düzgün qiymətləndirməliyik. Baxmalıyıq ki, hansı çempionatdan gəlib, hansı təcrübədədi. Nadir hallarda bir komanda 90 dəqiqə dominantlıq edir. Belə bir şey yoxdu. Qarşımızda böyük beşlik liqası komandası idi. Bundesliqada 3-cüdü. Rəqib ciddidi. Heç nədən penalti oldu. Bəzi epizodlarda onların gücü tam istədiyimiz hücumların alınmasına imkan vermədi.

- Kevin Medina ilk hissədə də sərt müdaxilələr edirdi. Fasilədən sonra isə qırmızı vərəqə aldı. Ona daha yumşaq oynaması ilə bağlı fikir bildirmişdiz?
- Ümumən hər oyundan əvvəl futbolçulara bu barədə məlumat veririk. Yadlarına salırıq ki, bəzi epizodlarda daha diqqətli, soyuqqanlı olmalıdılar. Daha da çalışmalıdılar ki, diqqətli olsunlar. Bu turnirdə sürət tam başqadı. Bəlkə, çempionatımızda belə hallar nadirən olur. Sürətli, dinamik oyunlarda belə hallar olur. Dünya futbolunda gördüyümüz təcrübədi. Daha soyuqqanlı ola bilərlər, Oyundan əvvəl aqressiv olmağı tapşırmışdım. Amma həm də diqqətli olmalıyıq. Aqressiyadan razıyam. Bu da gələcək üçün təcrübə oldu.

- İki tur əvvəldən Konfrans Liqasının təmin edilməsinin növbəti matçlara təsiri oldumu?
- Bilmirəm, nə qədər təsiri oldu. Amma oyunlarımıza baxanda rahatlıq görünmədi. Əksinə, hər iki matçda qələbə qazanmağa çalışdıq. Ola bilər, rəqiblər daha ciddi oldular. Bizim üçün nəticə və oyun baxımından ciddi təsir olmadı.