Azərbaycanlı FİFA referisi Əliyar Ağayev Avropa arenasında növbəti dəfə iş başında olub. Gənc hakim Avroliqanın qrup mərhələsinin ilk turunun “Gimaraynş” – “Zalsburq” görüşünü idarə edib. İ qrupu çərçivəsində “Afonso Enrikeş” stadionunda baş tutan qarşılaşmada komandalar hərəyə 1 qol vuraraq, heç-heçəyə razılaşıb. “Gimaraynş”ın kapitanı Pedraonun 25-ci dəqiqədə vurduğu qola hissənin son dəqiqəsində qonaqlardan Valon Berişa cavab verib.
Əliyar Ağayev görüş ərzində 40 dəfə oyuna müdaxilə etməli olub. Belə ki, ev sahibləri 16, qonaqlar isə 24 dəfə qayda pozuntusuna yol verib. Buna baxmayaraq, referi cəmi bir sarı vərəqə ilə kifayətlənib. Onu da 4-cü uzatma dəqiqəsində “Zalsburq”un yarımmüdafiəçisi Kristof Leytqeb alıb.
Maraqlıdı ki, "Gimaraynş" sözügedən görüşdə avrokubokda əsas heyətdə bir avropalı futbolçu belə meydana buraxmayan ilk klub kimi tarixə düşüb.
