Srağagün “Qarabağ” Çempionlar Liqasının qrup mərhələsində debüt etdi. Son illərin dəyişməz çempionu “Stemford Bric”də “Çelsi” ilə üz-üzə gəldi və 0:6 hesabıyla uduzdu. “Köhlən atlar”ın yenilgisini gözləmək olardı. Çünki tarixində ilk dəfə qatılığın turnirdə “Çelsi” kimi rəqibə qarşı oynamaq çox çətindi. Lakin heç kim bu cür hesabı gözləmirdi desək, yanılmarıq. Gözləyənlər belə “Qarabağ”ın 6 cavabsız qol buraxmasını istəmirdi. 41150 azarkeşin izlədiyi qarşılaşmada, təbii ki, “Qarabağ” tərəfdarları da iştirak edib. Oyundan öncə xəbər verdiyimiz kimi, “İmarət Avropa” və “Milli Dəstə” Londondakı qarşılaşmanı izləməyə getmişdi. Bundan başqa, İngiltərədə və Avropanın müxtəlif ölkələrində yaşayan soydaşlarımız da “Qarabağ”a stadiondan dəstək verib. Bəs oyun azarkeşlərin gözündə necə keçib? Həmyerlilərimiz oyundan, arenadakı şəraitdən razı qalıbmı?
Sualları “Milli Dəstə”nin rəhbəri Şamil Mustafayev cavabladı: “Bizim azarkeş qrupundan 30-dan çox üzv “Stemford Bric”də olub. O cümlədən “İmarət Avropa”dan 2, “İmarət”dən də 6 nəfər stadionda olub. Yəni ürəkdən komandanı dəstəkləyənlərin sayı 40 nəfərə yaxın olub. 400 nəfərlik sektorun digər hissəsində isə Avropada yaşayan sıravi həmyerlilərimiz idi. Sağ olsunlar, sektoru tam doldurmuşdular. “İmarət” bir banner gətirmişdi. Lakin onlar əvvəlcədən icazə almamışdılar. Bu üzdən banneri açmağa icazə vermədilər. Yalnız Azərbaycan bayraqlarını və şərfləri buraxmışdılar. Oyundan öncə də açıqlamamda dediyim kimi, biletin üstündə “ayaqüstə dayanmaq olmaz” yazılmışdı. Bununla bağlı “Qarabağ”a müraciət etsək də, cavab almamışdıq. Buna baxmayaraq, üzvlərimiz ayaqüstə dayanmağa cəhd edib. Lakin mühafizəçilər buna imkan verməyib. Hətta aralarında kiçik mübahisə də yaşanıb. Onların edə biləcəyi yeganə şey şüarlar səsləndirmək oldu. “Qarabağ bizimdi, bizim olacaq”, “Bir daha, bir daha” və başqa şüarlar səsləndirdilər. Ayaqüstə dayanmadan tam azarkeşlik etmək olmur. İnanırıq ki, Madrid və Romadakı oyunlarda bu problemlərlə üzləşməyəcəyik. Öncədən bunlarla bağlı “Qarabağ”a xəbər edəcəyik ki, bizim üçün icazə alınsın. Artıq “Atletiko” və “Roma” ilə oyunlar üçün biletləri almağa başlamışıq. “Milli Dəstə” olaraq hazırlığımız Almaniya – Azərbaycan oyunu üçün gedir. Orda böyük xoreoqrafiya açmaq niyyətindəyik. Hazırda bizim üçün önəmli oyun budu”.
ŞƏFİ ŞƏFİYEV