Qadın voleybolçulardan ibarət Macarıstan millisinin yekun heyəti açıqlanıb. Ölkəmizdə keçiriləcək Avropa çempionatında A qrupundakı rəqiblərimizdən biri olan Macarıstan 13 oyunçu ilə Bakıya gələcək. Heyətdə “Azəryol”la “Azərreyl”də çıxış etmiş blokçu Edina Dobi də var. Sentyabrın 20-də ölkəmizə gələcək macarların heyəti belədi: toppaylayıcılar - Reka Bleyçer, Jujanna Talas; liberolar - Renata Şpin, Fruşina Tot; blokçular - Edina Dobi, Eçter Naqi, Viktoriya Naqi; hücumçular - Bernadett Dekani, Rita Liliom, Nikolett Sus, Qreta Şakmari, Kata Török, Lilla Vilyam.
Qeyd edək ki, millimiz ilk oyununu məhz bu komandaya qarşı keçirəcək. Sentyabrın 22-də Milli Gimnastika Arenasında keçiriləcək qarşılaşma 18.00-da başlayacaq.
Voleyboldan söz düşmüşkən, Bakıda Beynəlxalq Voleybol Federasiyasının (FİVB) məşqçilərin 1-ci kateqoriyası üzrə kursu keçiriləcək. Seminar oktyabrın 22-də start götürəcək və 5 gün davam edəcək. Məşqçilərə dərsləri yenə türkiyəli Nejat Sancak keçəcək. Seminara bir neçə ölkədən 30-dan çox mütəxəssisin gəlməsi gözlənilir.
Azərbaycan Voleybol Federasiyasının (AVF) vitse-prezidenti, qadınlardan ibarət millimizin baş məşqçisi Faiq Qarayev bu kursun Bakıda keçirilməsini müsbət qarşılayıb: “Bu il Azərbaycan və Gürcüstan Avropa çempionatına evsahibliyi edəcək. Bu yarışla yanaşı, beynəlxalq məşqçilik kursunun da Azərbaycan və Gürcüstanda voleybolunun inkişafına təkan verəcəyinə əminəm”.
Qeyd edək ki, türkiyəli mütəxəssis ötən il iyunun 15-dən 27-dək paytaxtımızda FİVB məşqçilərinin 2-ci kateqoriyası üzrə kurs keçmişdi. Həmin vaxt seminara 13 əcnəbi, 18 yerli mütəxəssis qatılmışdı.