Sentyabrın 27-də milli komandaların oyunları üçün nəzərdə tutulan həftə sona çatdı. Amma bu yazıda yığmaların son nəticələrinə nəzər salmayacağıq. Sadəcə, Portuqaliya ilə bağlı maraqlı məqama baxacağıq.

“Reddit” portalının forumuna qatılan istifadəçilərdən biri bu komandanın heyətini yaxşıca araşdırıb və bir o qədər gözlənilməz olmasa da, oyunçularla bağlı əyləncəli faktlar ortaya çıxarıb. Sən demə, Portuqaliya yığmasının əksər üzvlərinin menecerlik işlərini Jorje Mendeşə məxsus olan “GestiFute” agentliyi görür. Zarafat deyil, komandanın son oyunlarına çağrılan 26 futbolçudan 16-sı onun müştərisidi. Gəlin, onlarla tanış olaq.

* Yığmanın hər üç qapıçısı onunla əməkdaşlıq edir. Dieqo Koşta (Portu), Joze Sa (Vulverhempton) və Ruy Patrisionun (Roma) bu ilin son aylarında Qətərdə keçiriləcək dünya çempionatına yollanmaq şansı yüksəkdi. Qeyri-adi nəsə baş verməsə, əsas heyətdə “Roma”nın 33 yaşlı qapıçısı Patrisio çıxış edəcək.
* Müdafiə xəttində Mendeşin üç müştərisi var. Joao Kanselo ilə Ruben Diaş son illər “Mançester Siti” ilə əhəmiyyətli uğurlar qazanıblar. “Portu”nun şərəfini qoruyan 39 yaşlı Pepe isə 2007-ci ildən milli komandada 128 oyun keçirib və 7 qol vurub.
* Yarımmüdafiə xəttində çıxış edənlərdən 5-i transfer məsələlərinin həllini məşhur agentə həvalə edib. Onlar üç klubun formasını daşıyırlar: Danilo ilə Vitinyo PSJ-də, Ruben Neveşlə Mateuş Nuneş “Vulverhempton”da, Bernardo Silva isə “Mançester Siti”də oynayır.
* Hücumda, heç şübhəsiz, ilk növbədə Kriştiano Ronaldonun adını çəkməliyik. “Mançester Yunayted”in 37 yaşlı oyunçusu gənc yaşlarından Mendeşlə birgə işləyir. Ondan başqa Pedro Netu (Vulverhempton), Joao Feliş (Atletiko), Dieqo Jota (Liverpul) və Rafael Leao (Milan) da məşhur həmyerlisi ilə müqaviləyə malikdi.

Belə çıxır ki, 56 yaşlı Mendeş Portuqaliya yığmasını “özəlləşdirib”. Amma tam yox. Komandanın digər üzvlərinin hüquqlarını idarə edən və qorumağa çalışan firmaları da nəzərinizə çatdırırıq. Rafael Silva “Onsoccer”, Dieqo Dalot və Rikardo Orta “Proeleven”, Tyaqo Calo “Invictus Team”, Rafael Gerreyro “Wasserman”, Nunu Mendeşlə Bruno Fernandeş “MRP.Positionumber”, Joao Mario “P&P Sport Management”, Vilyam Karvalyo isə “Media Base Sport”un müştərisidi. Yarımmüdafiəçi Joao Palinyanın isə agenti yoxdu.

Amma Mendeşin bütün müştəriləri diqqətinizə çatdırdığımız siyahıya salınmayıb. Məsələ ondadı ki, baş məşqçi Fernando Santuş bəzi oyunçuları mundial ərəfəsindəki son toplanışa çağırmayıb. Onlardan Fabio Vieyra (Arsenal), Renato Sanşeş (PSJ), Andre Silva (Leyptsiq), Nelson Semedo, Qonsalo Gedeş, Daniel Podense (hamısı “Vulverhempton”), Fransişko Trinkao (Sportinq) və Rikardo Pereyra (Lester) da “GestiFute” agentliyinə bağlıdı. Bu oyunçuları da nəzərə alsaq, milli komandaya namizədlərdən 24-ü hüquqlarını Mendeşə həvalə edir.

Ortaya təbii sual çıxır: bəs baş məşqçi hansı firmaya güvənir? “Transfermarkt” saytı Santuşun agenti haqda heç bir informasiya vermir. Oktyabrın 10-da 68 yaşını tamamlayacaq mütəxəssis milli komandanı 2014-cü ildən çalışdırır. Ötən 8 ildə yığmanı AÇ-2016-da və Millətlər Liqasında qələbəyə daşıyan məşqçinin agentə ehtiyac duymamaq ehtimalı çoxdu.

Amma Mendeşin əməkdaşlıq etdiyi digər mütəxəssislərin siyahısı yetərincə genişdi. Onların hamısı portuqaliyalıdı: Joze Mourinyo (Roma), Serjio Konseysao (Portu), Nunu Eşpiritu Santu (Əl-İttihad), Bruno Laje (Vulverhempton) və 17 il Mourinyoya assistentlik etmiş Ruy Faria.