Ağatahir Əzimov U-19-un üzvlərinə top saxlamağı, ötürmə verməyi öyrədir - AÇIQLAMA
Futzal üzrə yüksək liqada 2022/23 mövsümünə bir neçə gün öncə start verildi. Turun son matçında U-19 “Record club.az” ilə üz-üzə gəldi.
Ağatahir Əzimovun rəhbərlik etdiyi yığma rəqibinə 0:14 hesabıyla uduzdu.
Maraqlıdı, darmadağına nə səbəb olub? Yeni formalaşan komanda bu qədərmi zəifdi? Bu suallara cavab tapmaq üçün Ağatahir Əzimovla əlaqə saxladıq:“Əlbəttə, belə məğlubiyyəti gözləyirdik. Çünki komandanı 1 ay öncə yığmışıq. Rəqibin heyətinin isə 90 faizi legionerlərdi. Bizdə 16-17 yaşlı uşaqlardı. Heç vaxt futzal oynamayıblar, anlayışları belə yoxdu. Uşaqları böyük futboldan, küçədən, ordan-burdan yığmışam. Böyük futboldan yaxşı oyunçuları kimdi bizə verən? Əlbəttə, özləri üçün saxlayırlar. Kimin dərslərə görə vaxtı olmur məşqə getməyə, kimdə alınmır, gəlir bizə. Bir ay ərzində nə öyrətmək olar onlara? Bəzi komandalar var ki, uşaq yetişdirirlər. Onlardan da bir neçə oyunçu almışam. Səbəb budu. Özüm uşaqları bu yaşdan yüksək liqaya atmışam ki, döyülsünlər, çətinlik görsünlər. Bilsinlər ki, Avropadakı komandalar necədi. Qapıya necə zərbə vurulduğunu görsünlər. Bizim vurduğumuz zərbədən sonra top qapıya güclə gedib çatır. Qapıçımız heç topu görmür. Çünki yeni başlayıblar məşq etməyə. Topu saxlamağı, ötürmə verməyi bilmirdilər. Bunları öyrətməyə başlamışam. Onsuz da bilirəm ki, bütün oyunlarda uduzacağıq. Amma yavaş-yavaş düzələcək. Ötənilki uşaqlar da öncə uduzurdular. Sonra isə başladılar “Neftçi” İK və qalan komandalardan xal almağa. 7-8 ay birgə işlədiyim uşaqları Alesio milli komandaya çağırır. Bizim uşaqlar futzala meyillidilər. Uşaq məktəbi olsa, bizdən yaxşı futzalçılar çıxar”.
Əzimovdan bəzi komandaların heyətində iranlı futzalçıların çoxluq təşkil etməsinə də münasibət öyrəndik: “Ona görə belədi ki, bizdə futzalçı yoxdu. Kimlər ki pul qazanmaq istəyir, gedib birinci, ikinci dəstədə oynayır. Bu da legionerlərin komandalara gəlişinə səbəb olur. Yaxşı sponsorlar olsa, normal maaş versələr, təbii ki, komandaların heyətində öz uşaqlarımız yer alar”.
ŞAİR ABDULLA
Digər xəbərlər
