Ramil Quliyevin uğurlu seriyası qırılıb. Türkiyəni təmsil edən həmyerlimiz Xorvatiyanın paytaxtı Zaqrebdə Boris Hanzekoviçin xatirəsinə həsr olunan yarışda fəxri kürsüyə yüksələ bilməyib. O, 100 m məsafəni 10,36 saniyəyə qaçaraq ilk “5-liy”i qapayıb. Finiş xəttini hamıdan tez yamaykalı Yohan Bleyk (10,05) keçib.
Yeri gəlmişkən, Quliyevin 200 metr məsafəyə qaçışda dünya çempionu olması Avropada avqustun ən yaxşısı seçilməsini şərtləndirib. Avropa Atletika İttifaqı hər ay internetlə aparılan sorğu vasitəsilə ən yaxşıları müəyyənləşdirir. Qurum ötən ayın ən yaxşı atleti nominasiyası üçün namizədlərin adlarını açıqlayıb ki, onlar arasında həmyerlimiz də olub. “Feysbuk” və “tvitter”də keçirilən səsvermə nəticəsində Ramil birinci yeri tutub.
