Millimizin voleybolçusu Nikalina Başnakova icarəyə verilib. İyunda “Bursa Böyükşəhər Bələdiyyəspor” klubu ilə müqaviləsini yeniləyən 19 yaşlı hücumçu karyerasını “Bursaspor”da davam etdirəcək. Birinci liqa təmsilçisi 179 sm boya malik Başnakova ilə birillik anlaşma əldə edib. Hücumçunun icarə müddəti bitdikdən sonra "Çelenc Cup"ı qazandığı superliqa klubuna qayıdacağı bildirilir. “Bursaspor” təmsilçimizlə yanaşı, Azərbaycan voleybolu üçün tanış simalarla da anlaşıb. Belə ki, komandaya yeni mövsümdə “Azərreyl” və “Bakı”nın sabiq baş məşqçisi Ancelo Vercesi rəhbərlik edəcək. Həmçinin onun həyat yoldaşı, Bakının “Lokomotiv” klubunda oynamış və superliqada mükafat əldə etmiş belaruslu blokçu Vera Klimoviç də 2017/18 mövsümündə “Bursaspor”un uğurları üçün çalışacaq.
Qeyd edək ki, əslən Belarusdan olan Nikalina “Bursa Böyükşəhər Bələdiyyəspor”un əvəzedici komandasına 2015-ci ildə “Azərreyl”in ikinci heyətindən yollanmışdı. O, aşağı yaş qrupları üzrə Azərbaycan millisində 2013-cü ildə debüt edib. Əsas komandaya namizəd olan Başnakova gənclər yığmamızın üzvüdü.