Sizin reklam burada

AFFA-nın gözü yol çəkir, Prosineçki vətənindən əl çəkmir

Baxış Sayı:717

AFFA-nın gözü yol çəkir, Prosineçki vətənindən əl çəkmir
AFFA, eləcə də futbol ictimaiyyəti hələ də Robert Prosineçkinin yolunu gözləyir. Əslində yığmanın baş məşqçisi hələ avqustun 15-də gəlməliydi. Hər halda, assosiasiyadan belə bir informasiya verilmişdi. Ancaq xorvat çalışdırıcı hər kəsi intizarda qoymaqda davam edir. Odu ki, dünən Prosineçkinin nə zaman vətənə dönəcəyini bir daha AFFA-dan soruşmaq qərarına gəldik. Qurumun Mətbuat və İctimaiyyətlə Əlaqələr Departamentinin aparıcı mütəxəssisi Firuz Abdulladan aldığımız bilgiyə görə, millin baş məşqçisi avqustun 20-də Bakıda olacaq. Lakin nə bilmək olar, bəlkə xorvat çalışdırıcı yenə də gəlişini ertələdi...
Təbii, Prosineçkinin də dincəlmək haqqı var. AFFA-dan əldə etdiyimiz bilgiyə görə, o il ərzində 3 ay məzuniyyət götürə bilər. Qurumla çalışdırıcı arasında imzalanan müqavilədə belə nəzərdə tutulub. Ancaq maraqlı bir mənzərə var. Xorvat iyunun 10-dan – Şimali İrlandiya ilə seçmə mərhələ görüşündən (0:1) sonra ölkəmizi tərk edib. Avqustun 20-də gəlsə belə, artıq 70 gün məzuniyyətdə olmuş sayılır. Deməli, 20 günlük haqqı qalır. Məgər, Prosineçki yanvarda – klublarımız təlim-məşq toplanışında olanda ölkəmizdə idi? Yaxud da Şimali İrlandiya ilə oyuna qədər 20 gündən artıq Bakıdan ayrı qalmayıb? Heç inandırıcı deyil. Hələ qarşıda daha 3 ay var və mütəxəssisin bu müddətdə vətəninə baş çəkəcəyi istisna deyil. Böyük ehtimalla, Prosineçki nəzərdə tutulan 3 aylıq məzuniyyət haqqını çoxdan “xərcləyib”. Sadəcə, onun AFFA-nın gözünü yolda qoyması da maraqlı mənzərədi. Olmaya, onu “Bursaspor”a buraxmayan qurumdan inciyib? Bəlkə bu yolla əvəz çıxır? Yoxsa ölkəmizdəki missiyasını bitmiş sayır? Hər şey ola bilər. Ancaq unutmayaq ki, sentyabrın əvvəlində yığmanı DÇ-nin seçmə mərhələsi çərçivəsində iki oyun gözləyir. Avrokubok matçlarında, premyer-liqanın ilk turlarında stadionda olmayan Prosineçkinin necə seçim edəcəyi ciddi sual doğurur.
FARİZ

Oxşar xəbərlər
SON XƏBƏRLƏR