Natiq Cəfərli problemin həll olunacağına inanmır
Rauf Əliyevin “Kukesi”yə qalmaqallı keçidi hələ də futbol ictimaiyyətinin müzakirə mövzusudu. Müqavilənin müddətiylə bağlı “İnter”lə futbolçu arasında yaşanan fikir ayrılığına hələ ki nöqtə qoyulmayıb. Bu söhbətdə kimin haqlı, kimin haqsız olduğunu zaman göstərəcək. Ancaq bir məqam bəllidi: nə qədər ki, klublarla futbolçular arasında ikili müqavilə mövcud olacaq, klubun futbolçuya ödədiyi maaş şəffaf şəkildə sənəddə əksini tapmayacaq, gələcəkdə də belə münaqişələrə şahidlik edəcəyik.
Məsələ ilə bağlı qəzetimizə açıqlama verən iqtisadçı ekspert Natiq Cəfərli isə ikili müqavilələrin vergi cinayəti olduğunu bildirməklə yanaşı, bu məsələdə hər iki tərəfin məsuliyyət daşıdığını bildirdi: “Əmək və vergi məcəlləsinə görə əməkhaqqından vergi tutulmalıdı. İkili müqavilənin bağlanması, heç şübhəsiz, vergidən yayınma cəhdidi. İşə götürən 20 faiz, işçi isə maaşından və yaxud qonorarından 3 faiz vergi verməlidi. Ortada ikili müqavilə varsa, deməli, həm işə götürən (klub), həm də işçi (Rauf Əliyev) vergidən yayınıb. Bu isə vergi cinayətidi. Bunun cəzası isə iki mərhələdən ibarət olur. Bu hal birinci dəfə baş veribsə, ilkin olaraq hər iki tərəf cərimələnir. Buna məhəl qoyulmasa və proses davam edərsə, artıq hər iki tərəfi vergidən yayınmağa görə cinayət məsuliyyətinə cəlb oluna bilər. Bu ikili mühasibatlığın bariz nümunəsidi. Fikrimcə, ikili müqavilələr tək “İnter”də yox, başqa klublarda da var. Sadəcə, bu gün üçün ictimaiyyətə məlum olan budu. Müqavilələrin tənzimlənməsi haqda qaydalara görə hüquqi və fiziki şəxslər arasında iki müxtəlif məzmunlu anlaşma imzalana bilməz. Bu hal yaşanıbsa, deməli, vergi orqanlarına daha az əməkhaqqının göstərildiyi müqavilə təqdim olunub. Bu da dediyim kimi, vergi qanunvericiliyin kobud şəkildə pozulması anlamına gəlir”.
Mütəxəssis bu məsələdə məsuliyyətin daha çox “İnter” rəhbərliyinin boynuna düşdüyünü də vurğuladı: “Qanunvericiliyə görə işə götürən şəxs daha çox məsuliyyət daşıyır və daha çox cərimələnir. Ümumi götürəndə isə hər iki tərəfin günahı var. Vergilər Nazirliyi bu işə çox ciddi yanaşmalıdı. Ancaq bizdə vəziyyət fərqlidi. Heç kimə sirr deyil ki, bizdə klubların əksəriyyəti iri ranqlı məmurların çətiri altında fəaliyyət göstərir. Vergilər Nazirliyi də istər onlarla, istərsə də AFFA rəhbərliyi ilə münasibətləri korlamamaq üçün bu işə ciddi yanaşmır. Bu da sonda büdcədən kifayət qədər böyük pulların yayınmasına səbəb olur. Heç inanmıram ki, yaxın vaxtlarda bu işdə irəliləyiş hiss olunsun. Bunun üçün sistemdə islahatlar aparılmalıdı”.
İqtisadçı ekspert sonda Avropa təcrübəsini yada salmağı unutmadı: “Son vaxtlar Kriştiano Ronaldo, Leonel Messi kimi meqaulduzlar vergidən yayındıqlarına görə böyük məbləğdə cərimələniblər. Hətta onların həbs olunması təhlükəsi də var idi. Avropada vergidən yayınmaq ən ağır cinayətlərdən biri sayılır. Təəssüf ki, biz hələ o səviyyəyə çatmamışıq. Bu yalnız o halda mümkün ola bilər ki, tutduğu vəzifədən asılı olmayaraq, hər kəs fəaliyyətini şəffaf şəkildə qursun, qanunvericilikdə göstərilən bütün tələbləri yerinə yetirsin”.
RƏŞAD