Birinci divizionda iştirak etmək istəyən komandaların sayı durmadan artır. “Binə” və “Göyçə”nin ardından daha bir komandanın aşağı dəstədə çıxış etmək istədiyi ilə bağlı xəbərlər gəir. Bu “Vətən”di. Əslində aşağı dəstədə neçə klubun itirak edəcəyi hələ dəqiq deyil. Amma “Vətən” daha ciddi görünür. Təhsil Nazirliyinin nəzdində fəaliyyət göstərən "Vətən" Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbinin bazasında yaradılıb. Aşağı yaş qrupları üzrə komandaları uğurlu çıxış edir. İndi də komanda birinci divizionda oynamağı hədəfləyib. Hətta baş məşqçinin də kim olacağı bəllidi. Bu, “Neftçi”dən yaxşı tanıdığımız Arif Əsədovdu. Ona uzun müddət yanında çalışmış Elmir Xankişiyev kömək edəcək. Klubda hazırda sənədləşmə işlərinin qaydaya salınması işləri gedir. “Vətən”ə Təhsil Nazirliyi sponsorluq edəcək. Bütün detallarla maraqlanmaq üçün Arif bəyin özü ilə danışmağı lazım bildik. Əsədov hələ heç nəyin dəqiqləşmədiyini, amma ehtimalın olduğunu söylədi: “Hamı təbrik edir, sağ olsunlar. Amma ortada rəsmi heç nə yoxdu. Bəli, görüş keçirib, müakirə etmişik. Yaxın zamanlarda məsələyə tam dəqiqləşməlidi. Bütün bu layihəni rəhbərlik təsdiq etməlidi. Təbii ki, “Vətən” məktəbi ölkə futboluna gənc istedadlar bəxş edir. Komandalar bir sıra çempionatlarda çıxış edir. Pis olmaz ki, əsas komanda da birinci divizionda çıxış etsin. Dəfələrlə demişəm ki, birinci divizionda işləmək ayıb deyil. Əksinə, bura hər bir mütəxəssis üçün bir təcrübədi. Bəli, istərdim ki, bu layihənin təməli qoyulsun və görüləcək işlər barədə plan cızılsın. Layihə uzunmüddətli olmalıdı və qarşıya dəqiq hədəflər qoyulmalıdı. Komanda birinci divizionda nə üçün çıxış edəcək, məqsədlər nə olacaq və başqa məsələlər. Bütün bunlar üzərində işləyirik. Hər şey rəsmiləşən kimi dolğun açıqlama verərəm. İndi deyə biləcəklərimi dedim. Həmişə mətbuata açıq olmalıyam. Dəqiq bir şey olsa, niyə gizlədim ki?”.
ŞƏFİ ŞƏFİYEV