Millimizin üzvü Rauf Əliyevin tezliklə “İnter”ı tərk edəcəyi ilə bağlı məlumat vermişdik. O, klubun taleyi qaranlıq olduğundan və həmçinin dərin maliyyə böhranı yaşadığından komandanı tərk etmək qərarını vermis, rəhbərliyə bu haqda bildirmişdi. 2018-ci ilin yayına qədər “İnter”lə müqaviləsi olan futbolçu özü də açıqlamasında getmək istəyidini bildirmişdi. Namizədlər arasında “Qarabağ”, “Səbail” və “Qəbələ” də var idi. Ən real namizəd kimi “qırmızı-qaralar”ın adları çəkilirdi. Lakin Raufa xaricdən də “elçi” tapılıb. Bu, Albaniyanın “Kukesi” klubudu. Sözügedən ölkənin “supersport.al” saytının yazdığına görə, 28 yaşlı hücumçu artıq “şimal-şərqlilər”lə ilkin razılıq edib. Mənbə qey edib ki, Əliyev klubla 1 illik müqavilə bağlayacaq və avqustun 11-dən məşqlərə qoşulacaq.
Bu arada “İnter” rəhbərliyi futbolçunu buraxmaq istəmir. Klubun Müşahidə Şurasının sədri Zaur Axundov da bildirmişdi ki, Əliyevin klubla daha bir illik müqaviləsi var. Üstəlik, “İnter” Rauf Əliyevin adını növbəti mövsüm üçün sifariş edib. Onun adı PFL-ə göndərilən vərəqədə yer alıb.
ŞƏFİ ŞƏFİYEV