Stokholmda “Brilyant liqa”nın dünya çempionatı ərəfəsindəki sonuncu mərhələsi keçirilib.

Football-plus.az orda elə bir yüksək göstəricilər qeydə alınmayıb. Ulduzlar ilin əsas yarışına hazırdılar. Hər şey adi qaydada gedirdi, bir məqam olmasaydı... Söhbət Mondo Düplantisdən gedir. İsveçli üçün havanın isti-soyuq olmasının, hansı yarışda iştirak etməyin fərqi yoxdu. Adama elə gəlir ki, o başqa planetdəndi. Əsasən də ona görə dolan tribunalar önündə Düplantis şüvüllə tullanmada yeni rekord müəyyənləşdirdi – 6,16 metr.

Mondo qışda plankanı 6,20 metrə qaldırdı. Özü də bunu ən vacib məqamda – Belqraddakı dünya çempionatında etdi. Ancaq manej tam fərqli məkandı. Orda külək, yağış, soyuq və ya isti yoxdu. Elə Sergey Bubka da qapalı yerlərdə açıq yerlərlə müqayisədə (6,15 6,14-ə qarşı) daha yüksək nəticə göstərirdi. Düplantis bu nəticələrin ikisini də yenilədi. Şübhə yoxdu ki, getdikcə fərqi artıracaq. O artıq mümkün bütün rekordları yeniləyib. 2015-ci ildə keçirilən yeniyetmələr arasında dünya çempionatında 5,30 metr nəticə göstərmişdi. Ondan sonra hər il 15-20 sm artırır. 2018-də yeniyetmələr üçün dünya rekordu (6,05 metr) müəyyənləşdirdi. 2020-də artıq növbə Bubkanın rekordlarına çatdı. İsveçli ötən il Olimpiya Oyunlarının qalibi oldu. Ardından nəticəsini 6,20 metrə çatdırmaqla dünya rekordunu iki dəfə yenilədi. İndi də yay mövsümünü özünəməxsus şəkildə açdı. Hər kəs Yucindəki dünya çempionatında “ziyafətin davamını” gözləyir. Özü də o, amerikalılar üçün də yad deyil. Atası ordandı, Mondo okeanın o biri tayında böyüyüb.

Düplantisin karyerasının sonuna qədər hansı zirvələri fəth edə biləcəyi ilə bağlı yalnız gümanlar irəli sürmək olar. Axı onun cəmi 22 yaşı var. Halbuki həm Sergey Bubka, həm də Yelena İsinbayeva 30 yaşına qədər rekordlar müəyyənləşdirirdi. Mondonu onlardan, ümumiyyətlə, hər kəsdən fərqləndirən əsas cəhət tullanmağa “oynaq” münasibətidi. Hər idmançının özünəməxsus ritualı olur. Mondo isə start xəttinə elə yaxınlaşır ki, sanki dünya vecinə deyil. Birbaşa cəhd ərəfəsində kimləsə söhbət edə, hansısa əhvalat danışa, gülə bilir. Sonra isə start xəttinə yaxınlaşır və köklənməyə vaxt sərf etmədən qaçır, tullanır. Bir sözlə, izaholunmaz şəkildə soyuqqanlı davranır. Belə rahatlıq hər idmançıya xas olan keyfiyyət deyil. Məhz buna görə Düplantisə çox asanlıqla yadplanetli demək olar. Bizə isə yalnız izləmək və heyran olmaq qalır.