“Bunu bacardığıma görə tüklərim biz-biz oldu”
Portuqaliya çempionatında yeni mövsüm start götürüb. “Boavişta” Portimanda debütant “Portimonense”yə uduzub – 1:2. Emin Mahmudovun adı oyunun protokoluna salınmayıb. “Damalılar” növbəti turda Portuda “Riu Ave” ilə münasibətləri aydınlaşdıracaq.
Çexiya çempionatında 2-ci tur başa çatıb. Turun son oyununda “Mlado Boleslav” evdə “Sparta”ya 0:1 hesabı ilə yenilib. Kamran Ağayevin adı “18-liy”ə salınmayıb.
Hələ də xala həsrət qalan və sonuncu – 16-cı pillədə qərarlaşan “ağ-göylər” növbəti turda “Karvina”nın qonağı olacaq.
Almaniya regional liqasının Şimal-Şərq zonasında 3 tur geridə qalıb. Ancaq “Dinamo” hələ ki cəmi 1 oyun keçirib. Berlinlilər ilk turda səfərdə “Lukkenvalde”ni darmadağın edib – 4:1. Bu qarşılaşmada 90 dəqiqə oynayan Rüfət Dadaşov dubla imza atıb. 54-cü dəqiqədə penaltidən komandasının 2-ci qolunu vuran hücumçu 3-cü uzatma dəqiqəsində son nöqtəni qoyub. 3 xalla 9-cu pillədə qərarlaşan “ayılar” sabah 2-ci turdan təxirə salınan və Almaniyanın paytaxtında baş tutacaq “Vakker”lə oyuna çıxacaq.
Rüfətin kiçik qardaşı da inamlı təsir bağışlayır. Bundesliqasının yeni mövsümünə hazırlaşan Renatın formasını geydiyi “Ayntraxt” növbəti yoxlama oyununu keçirib. Bir gün əvvəl “Betis”lə (3:0) görüşü buraxan Dadaşov bu dəfə "Frankfurt"a qarşı oynayıb. Baş məşqçi Niko Kovaç yığma üzvünə ikinci 45 dəqiqədə oynamaq fürsəti verib. Frankfurt derbisində bundesliqa təmsilçisi böyükhesablı qələbə qazanıb – 5:2. 18 yaşlı futbolçu baş məşqçinin etimadını doğruldub. Belə ki, Renat 47-ci dəqiqədə komandasının 3-cü qolunun müəllifi olub. Dadaşov görüşdən sonra bunları deyib: “Qol vuracağıma ümid edirdim. Bunu bacardığıma görə tüklərim biz-biz oldu. Fərqlənmək üçün iki yaxşı imkanlar əldə etdim. Bunlardan birini dəyərləndirdim. Artıq növbəti həftəyə köklənmək vaxtıdı. Bizim üçün çempionatda hər oyun vacibdi. Bütün gücümüzü meydanda qoyacağıq. Azarkeşlərə təşəkkürümü bildirirəm. Gəlib bizə dəstək oldular. Ümid edirəm ki, yeni mövsümdə çox oynamaq şansı qazanacam. Əsas məqsədim inkişaf etməkdi”.
“Kadis” isə yoxlama oyununda “Rekreativo”ya uduzub – 0:1. Eddi İsrafilov 72-ci dəqiqədə qazona ayaq basıb.
SƏRXAN