Azərbaycan üzgüçüləri Ramil Vəlizadə və Məryəm Şeyxəlizadəxangah Macarıstanın Budapeşt şəhərində təşkil olunacaq üzgüçülük üzrə dünya çempionatında çıxışlarına start verirlər.

Bu məlumatı "Football-plus.az"a Azərbaycan Üzgüçülük Federasiyasının mətbuat xidmətinin rəhbəri Məqsəd Rəhimov verib. Onun sözlərinə görə iyunun 20-də Ramil Vəlizadə 200 metr batterflyay üsulunda, iyunun 23-də isə Məryəm Şeyxəlizadəxangah isə eyni növdə 50 metr yarışlara start verəcək. Burda hər iki idmançının B lisenziyası var.

Mətbuat Xidmətinin məlumatına görə bu yarışlar öncəsi Azərbaycan üzgüçüləri Ramil Vəlizadə və Məryəm Şeyxəlizadəxangah və üzgüçülük üzrə milli komandanın baş məşqçisi Rəşad Əbdürəhmanov Macarıstanın Györ şəhərində adıçəkilən ölkənin yığması ilə birgə təlim-məşq toplanışına qatılıblar.

Hazırlıq çərçivəsində idmançılarımız Macarıstan yığması ilə yanaşı Yeniyetmələrin Avropa Olimpiya Festivalına və Rumıniyada keçiriləcək Gənclərin Avropa Çempionatına hazırlaşan digər komandalarla birgə gərgin məşqlərlə öz bacarıqlarını artırıblar.