Musa Qurbanov Şaban Şirdanovu geri qaytardı
Ötən mövsüm birinci divizionda çempion olmağı hədəfləyən “Zaqatala” məqsədinə çata bilmədi. Komanda nəinki qızıl medallar uğrunda mübarizə apara bildi, ümumiyyətlə, ilk “3-lüy”ə də düşməyi bacarmadı. Baxmayaraq ki, bölgə klubu çempionata olduqca yaxşı start vermişdi. Üstəlik, baş məşqçi Şaban Şirdanovun əlinin altında təcrübəli futbolçular var idi. Amma gözləntilər doğrulmadı. Zədələr, qeyri-sabit çıxış, o cümlədən maaşların gecikməsi “Zaqatala”nı hədəfindən uzaqlaşdırdı. Nəticədə klub rəhbərliyi mövsümün sonunda Şirdanovla yollarını ayırdı. Üstəlik, komanda premyer-liqada mübarizə aparmaq üçün AFFA-ya müraciət də etmədi. Klubun İdarə Heyətinin sədri Musa Qurbanov bu qərarına belə aydınlıq gətirmişdi: “Biz ilk “3-lüy”ə düşsəydik, müraciət edərdik. İndi premyer-liqada oynamağı haqq etməmişik”.
Ardınca “Zaqalata” ilə bağlı heç də xoş olmayan xəbərlər gəlməyə başladı. Bəli, aşağı dəstə təmsilçilərinin həmişəki dərdi yenə maliyyədi. AFFA-nın klubu maliyyələşədirməkdən imtina etdiyi haqda söz-söhbət dolaşdı. Təxminən iki aya yaxın “Zaqatala”da tam səssizlik hökm sürdü. Ötən həftə isə İdarə Heyəti keçirdiyi iclasla bu səssizliyə son qoydu. Məlumata görə, AFFA yenidən klubu maliyyələşdirəcək. Lakin bu dəfə hədəflər fərqli olacaq. İdarə Heyətinin qərarına görə, komandanı yenidən Şaban Şirdanov çalışdıracaq. Maraqlıdı, deyilmi? Musa bəy mövsümün sonunda “Şirdanov ümidlərimizi doğrultmadı” deyərək göndərdiyi adamı yenidən baş məşqçi postuna qaytardı. Burda bir əmma var. Bu üzdən Qurbanovun özü ilə danışmağı lazım bildik.
O belə qərarı Şirdanovun Zaqatalada uşaq futbolunu yaxşı tanıdığı üçün verdiyini bildirdi: “Bəli, İdarə Heyətinin iclası oldu. Qərara aldıq ki, Şaban Şirdanovu kluba qaytaraq. Şaban bəylə birillik müqavilə bağlamışıq. Xeyr, məsələ başqa məşqçi tapa bilməməyimizdə deyil. Bilirsiz, baş məşqçi postunda yerli futbolu bilən adam işləməlidi. İndi qarşımızda fərqli məqsədlər olacaq. Başqa məşqçini çağırsaydıq, kluba əlavə maliyyə cəlb etməli olardıq. Çünki hədəflər fərqli olacaqdı. Yeni sponsorların tapılıb-tapılmayacağını isə indidən demək çətindi. Komandada yalnız yerli uşaqlar çıxış edəcək. Şaban Şirdanov bu bölgənin futbolunu yaxşı bilir. Zaqatalada uşaq futbolunun inkişafında onun danılmaz zəhməti olub. Heç kim futbola diqqət ayırmadığı bir vaxtda o bizim yanımızda olub. Hamımız onu yaxşı tanıyırıq. Üstəlik, yeganə zaqatalalıdı ki, A kateqoriyası var. O, bundan sonra uşaq futboluna daha çox diqqət ayıracaq. Bütün bunları nəzərə alaraq, Şirdanova yenidən güvəndik”. Qurbanovun sözlərinə görə, komanda artıq təlim-məşq toplanışına başlayıb: “Dünəndən hazırlığa başlamışıq. Hələ heyət tam yığışmayıb. Dediyim kimi, komandada ancaq yerli uşaqlar olacaq. Qarşıda təlim-məşq toplanışımız nəzərdə tutulub. Bir neçə yoxlama oyunu keçirəcəyik. Avqustda “Səbail”in əvəzedici komandası ilə qarşılaşacağıq. Onlar Zaqatalada təlim-məşq toplanışı keçirlər. Sonra “Ağsu” və “Energetik”lə qarşılaşacağıq. Ola bilsin ki, komanda tam formalaşandan sonra Bakıya gəldik və orda da yoxlama oyunları keçirdik”.
Klub rəhbəri AFFA-dan ayrılan maliyyənin azalmadığını da diqqətimizə çatdırdı: “AFFA həmişəki maliyyəni yenə ayıracaq. Büdcədə azalma olmayıb. Bir məqamı nəzərə alaq ki, ölkədə bəzi qiymətlərdə artım olub. Otel, yol xərcində xeyli fərq var. Özünüz də durumu yaxşı anlayırsız. Düzdü, hansısa problemin olacağına inanmıram. Lakin qənaət etməliyik”.
Musa bəy növbəti mövsüm “Zaqatala”nın “6-lığ”a düşmək üçün mübarizə aparacağını bildirdi: “Rəhbərlik və məşqçilər korpusu ilə məsləhətləşdik ki, ilk “6-lıq”da yer almalıyıq. Ondan aşağı yeri tutmaq olmaz. Düşünürəm ki, bu bizdə alınacaq”.
Sonda Qurbanov bəzi iş adamlarının komandaya kiçik maliyyə dəstəyi vermək istədiyini də bildirdi: “Əlavə sponsorlar deyəndə ki, bəzi adamlar kiçik maliyyə köməyi göstərmək istəyirlər. Lakin bu bizi qane etmir. Çünki qarşımızda hədəf yoxdu. Onlardan da pul alıb, asılı vəziyyətdə qalmaq istəmirik. Hələlik əlimizdə olandan istifadə edək və bacardığımızın ən yaxşısı üçün çalışaq”.
ŞƏFİ ŞƏFİYEV
