Ağır atletika üzrə qadınlardan ibarət yığmamız “AAAF Park”ın Astaradakı təlim-məşq bazasında hazırlığı davam etdirir. Təqvim planına uyğun olaraq həyata keçirilən toplanışa böyük məşqçi Natalya Prişepa və onun köməkçisi Təranə Abbasova rəhbərlik edir.
Yığmamızın üzvləri gündə iki dəfə məşq keçməklə intensiv hazırlıq mərhələsindədi. Komandamız sentyabrın 22-dən 30-dək Kosovoda keçiriləcək yeniyetmələr arasında Avropa birinciliyi, oktyabrın 15-dən 22-dək Albaniyada təşkil olunacaq gənclər arasında qitə çempionatı və başqa beynəlxalq yarışlara səylə hazırlaşır.
Ağır Atletika Federasiyasının baş katibi Rizvan Rəsulov federasiyanın rəsmi saytına verdiyi açıqlamada millinin toplanışını dəyərləndirib: “Təlim-məşq toplanışının axarını müntəzəm izləyirik. Müəyyən vaxtlarda bura baş çəkib idmançıların hazırlıq səviyyəsinin şahidi olur, gedişatla bağlı məşqçilərlə söhbət edirik. Problemləri həll edir, tövsiyələrimizi verir, kollektiv uğura doğru irəliləyirik. Əminik ki, qızlarımız bizi bütün yarışlarda uğurla təmsil edəcəklər”.
Xatırladaq ki, Astaradakı çoxfunksiyalı bazada 150 nəfərlik yarış və 20 nəfərlik ağır atletika məşq zalı, paltardəyişmə otaqları, SPA mərkəzi, həmçinin ən müasir avadanlıqlarla təchiz olunmuş geniş fitnes zalı, 50 nəfərlik yeməkxana və başqa otaqlar idmançıların istifadəsinə verilib.