Yaxşısı-pisi, zəifi-güclüsü ilə Region Liqası başa çatdı.

2021/22 mövsümündə “Cəbrayıl” rəqiblərini geridə qoydu. Cavid Hüseynovun yaratdığı komanda qısa müddətdə iddiasını ortaya qoydu. Ancaq... Düşünürəm ki, Hüseynovun komandası o qədər də ciddiyə alınmamışdı. Amma atalar bu yerdə yaxşı deyib: “ummadığın daş baş yarar”. “Cəbrayıl” yavaş-yavaş böyüdü, səssizcə, iddiaları haqda ilboyu car çəkmədən qalib oldu.

Bu günə qədər çox az adam vardı ki, “Cəbrayıl”ı favorit görsün. Çoxları düşünürdü ki, prezidentinin və baş məşqçisinin iddialı çıxışları ilə seçilən “Xan Lənkəran”ın iddiası daha böyükdü. Cənub təmsilçisinin heyəti də onları vaxtından əvvəl çempion elan etməyə əsas verirdi. Lakin yarımfinaldakı nəticə fərqli oldu. İbrahim Uzuncanın komandası özündən zəif bildiyi “Araz-Naxçıvan”a 1:2 hesabı ilə məğlub oldu. Matçdan sonra məlum məsələylə bağlı AFFA-ya müraciət edən kollektiv iddiasında haqlı olduğundan finalda oynamaq imkanı qazandı. Bəlkə heç Uzuncanın da ağlına gəlməzdi ki, bu qələbə komandası üçün məğlubiyyətə bərabər olacaq. Bəndənizin bunu deməsinə əsas verən məqam var. O da türkiyəli mütəxəssisin “Cəbrayıl”ın qələbəsindən sonra “CBC Sport”a verdiyi fləş-müsahibədə işlətdiyi sözlər idi. PRO kateqoriyalı mütəxəssis “həmişə favoritlər qalib gəlmir” dedi. Həqiqətən də maraqlıdı, İbrahim bəy, görəsən, öz komandasını bu qədər güclü görür, yoxsa rəqibini bu qədər zəif? Fikrimcə, hər iki baxış keçərlidi. Ancaq dünən nəticə bunun əksini göstərdi. “Cəbrayıl”ın qələbəsi iddia ilə nəticənin üst-üstə düşməsinə dair klassik nümunədi. 1/4 finaldan bəri heç bir oyunda qarabağlıları üstün görmədik. “Energetik”in, ardınca da “Qusar”ın bu təcrübəsiz komandanı yarışdan kənarlaşdıracağını düşündük. “Araz-Naxçıvan”ın “lipa” məsələsi ortaya çıxana qədər fikirləşdik ki, Azər Bağırovun kollektivi “Xan Lənkəran” kimi rəqibi məğlub edibsə, “Cəbrayıl”ı da asanlıqla yenər.

Amma nəticələr göz qabağındadı. Ola bilsin, Cavid Hüseynov rəqibləri kimi geniş heyətə, maliyyəyə və ya PRO kateqoriyasına malik deyil. Ancaq onun təcrübəsi, “oyunu oxumaq” bacarığı özünü göstərdi. Sübut etdi ki, futbolçuluq dönəmini ancaq başını aşağı salıb oynamaqla keçirməyib. Həqiqətən də hər məqamı götür-qoy edib. Bunu həm “Energetik”, həm də “Qusar” ilə matçda sübut etdi. Razıyam, dünənki qələbədə “Xan Lənkəran”ın imkanlardan istifadə edə bilməməsinin də rolu oldu. Xüsusən də son dəqiqədə qaçırılan penalti. Lakin bu məqam qarabağlıların haqlı qələbəsinə kölgə sala bilməz. Tarixdə həmişə nəticə qalır. İkincilər isə ən yaxşı halda bir müddət xatırlanır. Nəticə olmayanda ilboyu deyilən sözlərin, verilən vədlərin də heç bir önəmi qalmır. Ehtimallar isə zamanla unudulur. Məsələn, “finalda “Araz-Naxçıvan” oynasaydı, qalib gələrdi, “Xan Lənkəran”ın penaltisi qol olsaydı, matç uzatmaya gedərdi” və s. və i.a. Təbii ki, bu nəzəriyyə qısa zamandan sonra tarixə qovuşacaq. Çünki tarixdə həmişə nəticələr qalır və uğurlar xatırlanır.

SƏNƏM FƏRHADOVA