SOCAR EKOL-u tarixin yaddaşına “gömdü”
Cari mövsümdə futzal üzrə yüksək liqanın ikincisi olan, finalda “Araz Naxçıvan”a yenilərək gümüş medallara sahib çıxan EKOL srağagün fəliyyətini dayandırdı.
Başverənlərlə bağlı qəzetimizə açıqlama verən komandanın kapitanı Namiq Məmmədkərimov ürəkyanğısı ilə xəbəri təsdiqlədi: “Srağagün EKOL-un soyadını unutduğum Ramin adlı rəhbəri kollektivi qəbul etdi. Son illərdə komandanın çıxışından, əldə olunan uğurlardan danışandan sonra bildirdi ki, artıq EKOL-un fəaliyyətinə nöqtə qoyulur. Bundan sonra kollektivə himayədarlıq edə bilməyəcək. Söhbət əsnasında göstərişin SOCAR-dan gəldiyini də vurğulamağı unutmadı. Çox qəribədi ki, bu söhbət artıq iki gündü bilinir, ancaq nədənsə heç kim bunu ictimaiyyətə açıqlamaq istəmir. Təsəvvür edin, 14 illik komanda dağılır, amma heç kimin vecinə deyil. Sonra da deyirik ki, niyə Avropa çempionatında və ya başqa mötəbər turnirlərdə uğur qazana bilmirik... EKOL ölkə futzalında müəyyən çəkisi olan üç komandadan biri idi, heyətində təcrübəli futzalçılar yer alırdı. Belə çıxır ki, futzal heç kimə lazım deyil. Sadəcə, gəlişigözəl sözlər ancaq mətbuatda çıxış etmək üçün imiş”.
EKOL niyə fəaliyyətini dayandırdı, bu qərarı kim verib və nədən qaynaqlanıb? Bu suallara cavab tapmaq üçün klub rəhbərliyini aradıq. Ancaq suallarımıza cavab tapa bilmədik. Kluba yaxın, lakin adının çəkilməsini istəməyən şəxs bizimlə söhbətdə qərarın qəfil ortaya çıxmadığını, hələ iki ay öncədən EKOL-un “qələminin qırıldığını” dedi: “Təxminən ayyarım əvvəl şirkətə yeni təyin olunan rəhbərlik “EKOL hara, futzal komandasına sponsorluq etmək hara? Bu, şirkətin profilinə uyğun deyil” deyib, yayda klubun fəaliyyətinin dayandırılmasına qərar verib. Əsas səbəb SOCAR-dan EKOL şirkətinə ayrılan vəsaitin azaldılmasıdı. Rəsmi sənədlərdə komandanın üzvləri şirkətin işçiləri kimi ayrıca onlar üçün yaradılan şöbədə qeydiyyatdan keçmişdilər. İndi həmin şöbə ləğv olunub. Hətta onu da bildirim ki, iki ay əvvəl yeni rəhbərlik “Neftçi” İK-i də bağlamaq istəyirdi. Onların fikrincə, bu idman klubu şirkət üçün əlavə yük, izafi xərcdi. Sonradan fikirlərindən daşındılar”.
Bu da ölkə idmanı adına növbəti biabırçılıq. SOCAR bir tərəfdən ölkə futboluna maliyyə ayırır, digər tərəfdən də klubları “dəfn edir”. İndi bunu necə başa düşmək olar, SOCAR rəhbərliyinin məqsədi nədi?
Görəsən, Futzal Federasiyası EKOL-un fəaliyyətini dayandırmasına necə baxır? Olmazdı ki, qurum rəhbərliyi daxili imkanlar hesabına 14 illik klubu yaşatsın? Federasiyanın mətbuat katibi Mahal Məmmədov qəzetimizə açıqlamasında klubları maliyyələşdirmək imkanlarının olmadığını söylədi: “EKOL-un bu vəziyyətlə üzləşməsi gözlənilməz oldu və təəssüf doğurur. Çünki 2008-ci ildən fəaliyyət gostərən komanda həmişə iddialı olub və çempionata rəng qatıb. Cari mövsümü də uğurlu keçirdilər, çempionatın gümüş medallarını qazandılar. Yayda hazırkı U-19-un bir neçə üzvünü də həyətə qataraq güclənmək istəyirdilər. Amma nəticə üzücü oldu. Sponsor məsələsinə gəlincə, federasiya özü məhdud büdcə ilə fəaliyyət göstərir, bununla belə, komandalara dəstəyini də əsirgəmir. Heç bir komandadan yarışda iştiraka görə üzvlük haqqı alınmır, legioner futzalçılara gorə ödəniş tələb olunmur, oyunlar keçirilən zalların içarə haqqını ödəyir, oyunları katib, həkim, diktor, timekeeperlə təmin edir, onların ödənişini edir, intizam sanksiyalarına görə futboldan fərqli futzal komandalarına maliyyə sanksiyaları tətbiq olunmur. Bunları Futzal Federasiyasi öz məhdud büdcəsi hesabına reallaşdırır, yüksək liqada iştirak edən U-19-un xərclərini qarşılayır. “Badamlı” şirkəti yüksək liqanın oyunları zamanı komandaları içməli su ilə təmin edir. Amma hansısa komandaya sponsorluq, əlavə ödənişlər etmək federasiyanın imkanları xaricindədi. Sponsorun cəlb edilməsi ilə bağlı klublar fəallıq göstərməlidi. Bəzən deyirlər, bölgələrdə oyunlar keçirilmir. Artıq neçə mövsümdü ki, çempiontımızda bölgə təmsilçisi də iştirak edir. Onlara dəfələrlə demişik ki, təmsil etdiyin rayonda oyun keçirməyə hazır olanda federasiyaya məlumat versinlər, rəqib, həmçinin oyunun təşkilində iştirakı vacib əməkdaşlar üçün nəqliyyatı biz təşkil edib, gələk. 3 il əvvəl belə bir təcrübə Qubada yasandı. Cari mövsümün ikinci yarısında Lənkəranda da belə bir görüş keçirmək istəyirdik. Ancaq komanda qış fasiləsindən sonra zəiflədi, öz meydanında oyun keçirməkdə maraqlı olmadı. Yenə deyirəm, federasiya imkan daxilində komandalara dəstək olur, amma bu da bir yerə qədərdi. Ümid edirik ki, EKOL-a sahib çıxan olacaq və belə bir komandanın tarixin yaddaşına köcməsinə imkan verməyəcək”.
RƏŞAD
