Azərbaycan millisinin baş məşqçisi Canni De Byazi İtaliya mətbuatına müsahibə verib.

"Football-plus.az" xəbər verir ki, "bresciaingol.com" saytına danışan italyan mütəxəssis Bakıdakı həyatından söz açıb:

"Azərbaycan ucsuz-bucaqsız bir yerdir. 3 milyon əhalisi olan paytaxtda Tanrı kimi yaşayırsınız. Şəhərin köhnə hissəsi o qədər gözəldir ki, ətrafdakı qala divarları ilə birlikdə YUNESKO-nun mədəni irsi siyahısına daxil edilib.

Əcnəbilərin yaşadığı kompleksdə, dəniz sahilində mənzilim var. Hara getsəz, yollar tıxac olur. Burada hər cür mətbəxi olan restoranlar, italyan məhsulları satan supermarketlər var".

De Byazi Albaniya yığması ilə qazandığı uğuru Azərbaycanla da təkrarlamaq istədiyini də deyib:

"Bəli, amma burada vəziyyət fərqlidir. Albaniyada oyunçuların demək olar, hamısı Avropada oynayırdı. İngiltərə, İspaniya və İtaliyada oynayan oyunçular komandanı inkişaf etdirirdi. Bizdə isə cəmi 5 oyunçu legionerdir. Onlardan biri Türkiyədə, biri Portuqaliyada, biri Almaniyada və ikisi Polşada çıxış edir".