PFL premyer-liqanın bombardirinə xüsusi mükafat verəcək - AÇIQLAMA
Şənbə günü premyer-liqada 2021/22 mövsümünə yekun vurulacaq.
Cari “futbol ili”nin qalibi “Qarabağ” oldu. “Neftçi” gümüş medallara yiyələndi. “Bürünc” uğrunda isə “Zirə” ilə “Qəbələ” arasında mübarizə gedir.
Ötən günlərdə qəzetimizə açıqlamasında PFL-in Texniki İdman Departamentinin rəhbəri Elgiz Abbasov mükafatlandırma mərasiminin son turda həyata keçəcəyini bildirmişdi. Mayın 21-də “Azərsun Arena”da “Qarabağ”la “Neftçi” üz-üzə gələcək. Tədbirlə bağlı qaranlıq məsələlər var.
Görəsən, mükafatlandırmadan öncə konsert proqramı nəzərdə tutulub? Həmin gün “Qəbələ” “bürünc”ə sahib çıxsa, medalları nə vaxt təqdim olunacaq? Premyer-liqanın bombardiri üçün xüsusi mükafat nəzərdə tutulub?
Bu suallara aydınlıq gətirmək üçün Elgiz Abbasovla yenidən əlaqə saxladıq:
“30-cu – yubiley Azərbaycan çempionatının sonuna gəldik. Mayın 21-də son turun oyunları keçiriləcək və görüşlər başa çatdıqdan sonra mükafatlandırma mərasimi təşkil olunacaq. Tədbir çempion “Qarabağ”ın stadionunda, “Azərsun Arena”da baş tutacaq. Həmin gün “köhlən atlar”la “Neftçi” üz-üzə gələcək. Oyundan sonra xüsusi səhnə quraşdırılacaq və çempion, eyni zamanda medalçılar təltif olunacaq. Bilirsiz ki, həm “Zirə”nin, həm də “Qəbələ”nin bürünc medal qazanmaq şansı var. “Qartallar” medalı təmin etsə, “Azərsun Arena”ya dəvət olunacaq. Amma “Qəbələ” “bürünc”ün sahibi olsa, onlar bir gün sonra PFL-ə dəvət oluncaq. Burda “qırmızı-qaralar”ın üzvlərinə medalları veriləcək. Bombardir məsələsinə gəlincə, hələ ki eyni sayda qol vuran oyunçuların sayı kifayət qədərdi. Son turda hansısa dəyişiklik olmasa, hər birinə xüsusi mükafat veriləcək. Buna artıq oyunlar başa çatandan sonra qərar veriləcək”.
İLKİN SULTANLI
Digər xəbərlər
